सोलापूर – प्रवाशांचा प्रवास अनुभव अधिक चांगला करण्यासाठी, सामुदायिक सहभाग वाढविण्यासाठी तसेच विमानतळावरील विविध प्रवासी-अनुकूल सुविधांविषयी जनजागृती करण्याच्या उद्देशाने सोलापूर विमानतळावर प्रवासी सुविधा दिवस साजरा करण्यात येणार आहे.
या निमित्ताने सोलापूर विमानतळावर आगमन व प्रस्थान करणाऱ्या प्रवाशांचे तिलक लावून व मिठाई वाटप करून स्वागत करण्यात येईल. कार्यक्रमादरम्यान दिवसभर नियमित अंतराने वंदे मातरम् चे गायन करण्यात येईल. कार्यवाहक विमानतळ संचालक सौ. अंजनी कुमारी यांनी माध्यमांना सांगितले की, उत्सव कालावधीत सोलापूर विमानतळावर विविध सांस्कृतिक व लोककला सादरीकरणांसह अनेक प्रवासी-केंद्रित उपक्रमांचे आयोजन करण्यात येणार आहे.
या उत्सवांतर्गत वृक्षारोपण मोहीम, सांस्कृतिक कार्यक्रम, शालेय मुलांसाठी चित्रकला स्पर्धा तसेच शासकीय शाळांतील विद्यार्थ्यांच्या शैक्षणिक भेटी आयोजित करण्यात येतील, ज्यामुळे त्यांना विमान वाहतूक क्षेत्र व विमानतळ संचालनाची माहिती मिळेल.
समर्पित सेवांबद्दल कृतज्ञता व्यक्त करण्यासाठी हाऊसकीपिंग कर्मचारी, एअरलाईन कर्मचारी, राज्य पोलीस कर्मचारी तसेच भारतीय विमानतळ प्राधिकरण (AAI) कर्मचारी यांचा सत्कार करण्यात येईल. उत्कृष्ट कार्य करणारे विमानतळ कर्मचारी व भागधारक यांचाही प्रवासी सेवा व कार्यक्षम संचालनातील योगदानासाठी गौरव करण्यात येईल.
यशोधरा मल्टीस्पेशालिटी हॉस्पिटल, सोलापूर यांच्या सहकार्याने प्रवासी, विमानतळ कर्मचारी व त्यांच्या कुटुंबीयांसाठी मोफत आरोग्य तपासणी व नेत्र तपासणी शिबिर आयोजित करण्यात येईल. तसेच स्थानिक ब्लड बँकेच्या सहकार्याने रक्तदान शिबिर देखील आयोजित करण्यात येणार आहे.
इतर आकर्षणांमध्ये स्वतंत्र सेल्फी पॉईंट, प्रवासी संवाद व अभिप्राय सत्र, विमानतळावरील सुविधा व सेवांविषयी जनजागृती मोहीम तसेच सोलापूर विमानतळावर उपलब्ध विविध सुविधांची माहिती समाविष्ट असेल.
प्रवासी सुविधा दिवस हा सोलापूर विमानतळाच्या प्रवासी समाधान, सामुदायिक सहभाग, पर्यावरणीय जबाबदारी आणि सेवा उत्कृष्टतेप्रती असलेल्या वचनबद्धतेचे प्रतीक आहे.
जारीकर्ता:
सौ. अंजनी कुमारी
कार्यवाहक विमानतळ संचालक
सोलापूर विमानतळ
भारतीय विमानतळ प्राधिकरण
