सोलापूर : महापालिकेतील लाड कमिटी अंतर्गत वारसा हक्काच्या नोकरीसाठी नियुक्ती पत्र मिळण्यास विलंब होत असल्याच्या कारणावरून एका अर्जदार तरुणाने आज महापालिकेच्या प्रशासकीय इमारतीवर चढून टोकाचे पाऊल उचलण्याचा प्रयत्न केला. यामुळे महापालिका आवारात एकच खळबळ उडाली. दरम्यान,मनपा अतिरिक्त आयुक्त, उपायुक्त आणि कामगार नेत्यांनी समजूत काढून सुरक्षित खाली आणले. यामुळे पुढील अनर्थ टळला. दरम्यान मंगळवार दिनांक 22 सप्टेंबर रोजी संबंधित अर्जदारास नियुक्ती आदेश देण्यात येणार असल्याचे उपायुक्त सोनाली यादव यांनी स्पष्ट केले आहे.
बुद्धभूषण प्रदीप कांबळे (रा. न्यू बुधवार पेठ, सोलापूर) असे त्या अर्जदार तरुणाचे नाव आहे. सोमवारी सकाळी 11.30 सुमारास प्रशासकीय इमारतीवर जाऊन या तरुणाने टोकाचे पाऊल उचलण्याचा प्रयत्न केला. प्रशासकीय इमारतीच्या सर्वात वरच्या मजल्यावर चढल्याचे पाहून आवारात एकच खळबळ उडाली. बघण्यासाठी मोठी गर्दी झाली होती. महापालिका अग्निशामक दल आणि ॲम्बुलन्सही दाखल झाली होती. माहिती मिळताच तत्काळ अतिरिक्त आयुक्त वीणा पवार उपायुक्त सोनाली यादव या घटनास्थळी दाखल झाल्या. त्याचबरोबर महामानव डॉ. बाबासाहेब आंबेडकर ट्रेड युनियनचे अध्यक्ष बापूसाहेब सदाफुले, महापालिका कामगार संघटना कृती समितीचे अध्यक्ष कामगार नेते अशोक जानराव, नगरसेवक गौतम कसबे यांनीही प्रशासकीय इमारतीवर जाऊन संबंधित बुद्धभूषण कांबळे याची समजूत काढण्याचा प्रयत्न केला. ऑडिटसह सर्व प्रक्रिया पार पाडूनही नियुक्ती आदेश देण्यास महापालिका सामान्य प्रशासनाकडून विलंब होत असल्याचा आरोप कांबळे यांनी केला. उपस्थित कामगार नेते आणि नगरसेवक यांनी मध्यस्थी करून त्या युवकाची समजूत काढली.अखेर अतिरिक्त आयुक्त वीणा पवार तसेच महामानव डॉ. बाबासाहेब आंबेडकर ट्रेड युनियनचे अध्यक्ष बापूसाहेब सदाफुले यांनी मध्यस्थी करून कांबळे यांची समजूत काढली आणि त्यांना सुरक्षित खाली उतरवले.
या प्रकरणी ऑडिट होऊन नियुक्तीचा मार्ग मोकळा झालेला असतानाही पुढील कार्यवाही रखडल्याने कांबळे यांना गेल्या काही काळापासून महापालिकेचे हेलपाटे मारावे लागत होते. अखेर टोकाचे पाऊल उचलण्याचा प्रयत्न केला.दरम्यान, बुद्धभूषण कांबळे यांची अतिरिक्त आयुक्त वीणा पवार यांच्याशी चर्चा झाली. यावेळी लाड कमिटी वारसा हक्काच्या नियुक्तीचा विषय तातडीने मार्गी लावण्याबाबत चर्चा करण्यात आली. ऑडिट प्रक्रिया पूर्ण झालेली असून प्रकरणातील कागदपत्रे नियमानुसार असल्याचे लक्षात घेऊन शासकीय नियमांनुसार तातडीने नियुक्तीपत्र देण्याचे आश्वासन दिले आहे.
आज मंगळवारी सायंकाळपर्यंत
नियुक्ती आदेश देणार : उपायुक्त यादव
सन 2024 मध्ये बुद्धभूषण प्रदीप कांबळे यांनी लाड कमिटी अंतर्गत महापालिकेकडे अर्ज केला होता. त्यानंतर 2025 मध्ये याच पदासाठी आणखी एक अर्ज कुटुंबातील दुसऱ्या व्यक्तीकडून दाखल झाला होता. संबंधित सेवकाने हयात असतानाच बुद्धभूषण कांबळे यांना नॉमिनी केले होते. सेवा पुस्तक पाहणे आणि इतर दुसरा अर्ज निकाली काढून नियुक्ती आदेश देण्याची प्रक्रिया सुरू होती. सेवा पुस्तक पडताळणी करून पुन्हा ऑडिट करण्याचा शेरा होता. फायनल ऑडिट राहिले होते. दरम्यान, एसआयआर या अभियानामुळे कर्मचारी अधिकारी गुंतल्याने प्रशासकीय विलंब झाला. आयुक्तांची मंजुरी घेऊन मंगळवारी सायंकाळपर्यंत संबंधित बुद्धभूषण कांबळे यांना नियुक्ती आदेश देण्यात येईल अशी माहिती महापालिका उपायुक्त सोनाली यादव यांनी सांगितले. एकाच पदासाठी इतर अर्ज दाखल झालेल्या प्रकरणांवर दर बुधवारी सुनावणी घेतली जात असल्याचेही यादव यांनी स्पष्ट केले.
प्रतीक्षा यादी अंतिम करा : अशोक जानराव
सोलापूर महानगरपालिका कामगार संघटना कृती समितीचे अध्यक्ष तथा कामगार नेते अशोक जानराव यांनी वारसा हक्काच्या सर्व अर्जांची शहानिशा करून पात्र उमेदवारांची अंतिम प्रतीक्षा यादी जाहीर करण्याची मागणी केली. यादी अंतिम होईपर्यंत नियुक्त्या देऊ नयेत, अशीही मागणी त्यांनी केली. तसेच कोणत्याही वारसदाराने टोकाचे पाऊल उचलू नये, असे आवाहन त्यांनी केले.
आकृतीबंधामध्ये या पदांची
तरतूद करावी : बापूसाहेब सदाफुले
महामानव बोधिसत्व डॉ. बाबासाहेब आंबेडकर ट्रेड युनियन कामगार संघटनेचे अध्यक्ष तथा कामगार नेते बापूसाहेब सदाफुले यांनी बुद्धभूषण कांबळे यांच्यासह सर्व वारसदारांना टोकाचे पाऊल न उचलण्याचे आवाहन केले. वारसदारांनी एकजूट होऊन आपल्या हक्कासाठी कायदेशीर व लोकशाही मार्गाने लढा द्यावा असे आवाहन करताना प्रशासनाने आकृतीबंधामध्ये या पदांची तरतूद करावी आणि सर्वांना नियुक्ती द्यावी. तातडीने या संदर्भात कार्यवाही करण्याची मागणी बापूसाहेब सदाफुले यांनी केली.
