छत्तीसगढमध्ये काँग्रेस पक्षाला मोठा झटका, भाजपने घेतली निर्णायक आघाडी. रायपूरमधील सात जागांवर भाजपचे उमेदवार आघाडीवर.
गेल्या काही दिवसांपासून पाच राज्यांमधील विधानसभा निवडणुकीमुळे राजकीय वर्तुळात धामधूम सुरु आहे. राजस्थान, मध्य प्रदेश, तेलंगणा, मिझोराम आणि छत्तीसगढची जनता कोणाच्या बाजूने कौल देणार,याची उत्सुकता सर्वांना होती. मिझोराम आणि तेलंगणा वगळता इतर राज्यांमध्ये भाजप विरुद्ध काँग्रेस अशी थेट लढत झाली. यापैकी छत्तीसगढमध्ये काँग्रेसला हमखास यश मिळेल, असा अंदाज होता. विविध संस्थांच्या एक्झिट पोल्सकडूनही तसा अंदाज वर्तवण्यात आला होता. आज सकाळी मतमोजणीला सुरुवात झाल्यानंतर समोर आलेले कल पाहता छत्तीसगढमध्ये काँग्रेस पक्ष भाजपला धोबीपछाड देऊन सहजपणे सरकार स्थापन करेल, असे जवळपास वाटत होते.
मात्र, सुरुवातीच्या अडीच ते तीन तासांचा कालावधी उलटल्यानंतर छत्तीसगढमध्ये मतमोजणीचे कल पालटायला सुरुवात झाली. त्यानंतर तासाभरात तर हे चित्र पूर्णपणे बदलले. सुरुवीताच्या दोन तासांमध्ये काँग्रेस पक्ष आघाडीवर होता. मात्र, नंतरच्या टप्प्यात भाजपने प्रथम काँग्रेसशी बरोबरी साधली आणि त्यानंतर निर्णायक आघाडी घेतली. सध्याच्या घडीला छत्तीसगढ विधानसभेच्या ९० जागांपैकी ४८ जागांवर भाजप तर ४० जागांवर काँग्रेसचे उमेदवार आघाडीवर आहेत. मध्यंतरीच्या काळात भाजपने १० जागांची आघाडी होती. मात्र, आता ही आघाडी पुन्हा ४ जागांपर्यंत खाली आली आहे. परंतु, भाजप अद्याप काँग्रेसपेक्षा आघाडीवर आहे. तर दोन जागांवर इतर उमेदवार आघाडीवर आहेत. छत्तीसगढमध्ये बहुमताचा आकडा ४६ इतका आहे. त्यामुळे येत्या काही तासांमध्ये हे चित्र कायम राहिल्यास छत्तीसगढमध्ये काँग्रेसला सत्तेपासून वंचित राहावे लागेल.
छत्तीसगढमध्ये काँग्रेसचे नेते आणि माजी मुख्यमंत्री भूपेश बघेल हेदेखील पिछाडीवर असल्याचे पाहायला मिळाले. पाटण विधानसभा मतदारसंघात भूपेश बघेल ५०० मतांनी पिछाडीवर आहेत. त्यांचे प्रतिस्पर्धी विजय बघेल आघाडीवर आहेत. त्यामुळे या मतदारसंघात अंतिम निकाल काय लागतो, हे पाहावे लागेल. छत्तीसगढमध्ये काँग्रेस पक्षातील अंतर्गत गटबाजी पक्षासाठी डोकेदुखी ठरली होती. याचा फटका प्रत्यक्ष निवडणुकीत बसला का, हे येत्या काही तासांमध्ये स्पष्ट होईल.
