माकड म्हणणाऱ्या उद्धव ठाकरेंना देवेंद्र फडणवीसांचं जशास तसं उत्तर, म्हणाले, त्यांना चांगल्या डॉक्टरची गरज!

देवेंद्र फडणवीसांनी उद्धव ठाकरेंना जशास तसं उत्तर दिलं आहे. उद्धव ठाकरेंचं मानसिक संतुलन बिघडलं आहे, त्यांना आता डॉक्टरांची गरज आहे, असं देवेंद्र फडणवीस म्हणाले आहेत.

नागपूर : शिवसेना उद्धव बाळासाहेब ठाकरे गटाचे पक्षप्रमुख उद्धव ठाकरेंनी  मुख्यमंत्री आणि उपमुख्यमंत्र्यांवर टीका करताना त्यांना माकड म्हणून संबोधलं होतं. त्यावर बोलताना उपमुख्यमंत्री देवेंद्र फडणवीस यांनी उद्धव ठाकरेंवर जोरदार टीका केली आहे. देवेंद्र फडणवीसांनी उद्धव ठाकरेंना जशास तसं उत्तर दिलं आहे. उद्धव ठाकरेंचं मानसिक संतुलन बिघडलं आहे, त्यांना आता डॉक्टरांची गरज आहे, असं देवेंद्र फडणवीस म्हणाले आहेत.

ठाकरेंनी माकड म्हणून संबोधल्यानंतर देवेंद्र फडणवीसांनी जोरदार हल्ला चढवला आहे. “उद्धव ठाकरे यांचे मानसिक संतुलन बिघडले आहे. त्यांना आता डॉक्टरची गरज आहे. ते रोज काहीतरी बदलतायेत. त्यामुळे त्यांच्यावर उपचार करावे.”, असा सणसणीत टोला देवेंद्र फडणवीसांनी लगावला आहे. पुढे बोलताना त्यांना शिव्या देण्याशिवाय दुसरं सध्या काहीही सुचत नाही, असा टोलाही त्यांनी लगावला आहे. जनतेनं त्यांना रिजेक्ट केलेलं आहे, त्यामुळे ते शिवीगाळ करण्यावर उतरले आहेत, असंही देवेंद् फडणवीस म्हणाले आहेत.

सध्या उद्धवजींचे गाईड पवारसाहेब, ते सांगणार तेच ठाकरे करणार : देवेंद्र फडणवीस
पवार साहेबांसोबत पक्ष अजित दादा ने उभा केला. पण त्यांना पक्षात स्थान मिळणार नाही, स्थान पवार साहेब सुप्रियांना देतील म्हणून ते बाहेर पडले. अजित पवार उद्धवजींना किती ओळखतात माहीत नाही. मी त्यांना चांगला ओळखतो, सध्या उद्धव साहेबांचे गाईड पवार साहेब आहेत. ते जे बोलतील ते उद्धव करतील, असंही फडणवीस म्हणाले.

काय म्हणाले उद्धव ठाकरे ?
उद्धव ठाकरेंनी मुख्यमंत्री एकनाथ शिंदे आणि उपमुख्यमंत्री देवेंद्र फडणवीसांवर जोरदार हल्लाबोल केला होता. शरद पवारांनी लोकसभेनंतर काही प्रादेशिक पक्ष काँग्रेसमध्ये विलीन होतील, असं वक्तव्य केलं होतं. त्यावर बोलताना शिंदे आणि फडणवीसांनी उद्धव ठाकरेंचा पक्ष विलीन होणार असल्याचं भाकीत बोलून दाखवलं होतं. त्यावरच बोलताना उद्धव ठाकरेंनी जोरदार पलटवार केला आहे.

ते म्हणालेले की, “दिल्लीश्वरांची दोन चावीची माकडं, त्यांच्या हातात कोलीत सापडलंय, एक माकड आहे दाढीवालं… त्यांना धड उद्धव बाळासाहेब ठाकरे हे नावंच उच्चारता येत नाही. माझं नाव घेताना त्यांच्या घशात बाठा अडकतो. त्यांच्या वडिलांचं आणि पक्षाचं ना एशंशि आणि दुसरे उपमुख्यमंत्री आहे ते देगंफ… ज्याला तुम्ही काय म्हणता? ते भांग प्यायलेल्या माकडांसारखं बोलतायत… शिवसेना हा छोटा पक्ष आहे का? माझं त्या दोन्ही माकडांना सांगणं आहे की, बाप बदलण्याची गरज मला नाही, बाप बदलण्याची गरज तुम्हाला आहे.”