‘पाकिस्तानच्या घोषणा देणारे आणि त्यांचे झेंडे फडकविणारे हेच उद्धव ठाकरे यांचे नऊ खासदार निवडून देणारे आहेत, असे वादग्रस्त वक्तव्य करून शिवसेनेला मतदान करणाऱ्या मतदारांविषयी आमदार नितेश राणे यांनी शंका उपस्थित केली आहे. त्याचवेळी उद्धव ठाकरे यांनी स्वतःचा इमान स्वाभिमान पाकिस्तानच्या झेंड्यासमोर गहाण ठेवला आहे, अशी घणाघाती टीकाही त्यांनी केली आहे.
राणे पुढे म्हणाले, वैष्णोदेवी दर्शनाला जाणाऱ्या भक्तांच्या बस गाडीवर दहशतवादी हल्ला झाला. आजपर्यंत १८ वैष्णोदेवी भक्तांनी या हल्ल्यात प्राण गमावले आहेत. आज हिंदुहृदयसम्राट स्वर्गीय बाळासाहेब ठाकरे असते तर अशा दहशतवाद्यांना थेट इशाराच दिला असता. परंतु उबाठा आणि त्यांचे नेते प्रवक्ते हे राजकारणापलीकडे काहीच बोलत नाहीत.
बाळासाहेब ठाकरे यांचे नाव घेण्यापूर्वी विचार आत्मसात करावेत: राणे
बाळासाहेब हे मुंबईत बसून पाकिस्तान हादरवून सोडण्याची असलेले नेते होते. मात्र आताच्या उबाठाच्या नेत्यांमध्ये दहशतवाद्यांना अद्दल घडवू असे बोलण्याची हिम्मतच नाही. कारण पाकिस्तानच्या घोषणा देणारे आणि त्यांचे झेंडे फडकविणारे हेच उद्धव ठाकरे यांचे नऊ खासदार निवडून देणारे आहेत. उबाठाचे नेते आणि उद्धव ठाकरे यांनी स्वतःचा इमान, स्वाभिमान पाकिस्तानच्या झेंड्यासमोर गहाण ठेवला आहे. ३० ते ३१ जागा पाकिस्तानचा झेंडा फडकावून जिंकलेले आहेत. याचा जल्लोष पाकमध्ये जास्त झाला. उद्धव ठाकरेंचा नागरी सत्कार पाकिस्तानमध्ये होईल, याचे नवल वाटायला नको. त्यामुळे स्वर्गीय बाळासाहेब ठाकरे यांचे नाव घेण्यापूर्वी त्यांचे विचार आत्मसात करावेत,असे देखील नितेश राणेंनी सुनावले आहे.
‘पाकिस्तानचे झेंडे फडकवणाऱ्यांवर मोदी-शहाच कारवाई करु शकतात’
आमच्या हिंदूंवर अतिरेकी हल्ले होत असतील तर पाकिस्तानचे झेंडे फडकवणाऱ्यांवर आम्ही कारवाई करू असं राऊत बोलतील का? ते बोलणार नाहीत. मात्र त्याच लोकांना चोख उत्तर मोदी साहेब, शहा साहेब देतील असे नितेश राणे म्हणाले आहेत.
हिम्मत असेल तर मुंबई पदवीधरची जागा लढवा, राणेंचे आव्हान
उबाठाला महाविकास आघाडीत किती दिवस ठेवायचं हे आम्ही ठरवू अशी धमकीच काँग्रेसने दिल्लीवरून दिली आहे. मात्र हिम्मत असेल तर मुंबई पदवीधरची जागा लढवा. काँग्रेसला कोकण पदवीधर मतदारसंघ दिला आहे. कारण उबाठाला आपले कोकणातील अस्तित्व संपले हे माहीत आहे.
‘जम्मू-काश्मीरमध्ये किती शांतता हे संजय राऊतांनी कुटुंबासह जाऊन बघावे’
३७० कलम हटविले त्यामुळे काश्मीरमध्ये किती शांतता आहे, हे संजय राऊत यांनी स्वतःच्या कुटुंबासोबत जाऊन बघावं. आता त्याठिकाणी उरलेल्या चार अतिरेकी टाळक्यांना मोदी साहेब यावेळी धडा शिकवणार आहेत. रोज सकाळी ४२० भ्रष्टाचारी संजय राऊत या माणसाला उद्धव ठाकरेंनी महाराष्ट्राच्या माथी मारलेला आहे. त्याला आधी थांबवा. कुत्र्याप्रमाणे तुझ्या मालकाला वापरलं जातंय त्यावर बोल. मागच्या दरवाजातून येणाऱ्यांना निवडणूक कधीच कळणार नाही, असे देखील राणे म्हणाले.
सर्वात मोठे हप्तेखोर संजय राऊत आणि त्याचा मालक आहे. त्यांनी दुसऱ्यांना हप्तेखोर बोलू नये. डोंबिवलीत जी घटना घडली अशी घटना पुन्हा घडू नये म्हणून आमचे नेते मंत्री रवींद्र चव्हाण, उदय सामंत बारकाईने लक्ष ठेवून आहेत. योग्य ती पावलं उचलली जातील, असेही आमदार नितेश राणे यांनी नमूद केले आहे.
