पहिल्या कसोटीसाठी विराट कोहलीने खास प्लॅनिंग केले आहे आणि या प्लॅननुसार त्याने सरावही केला. पण विराटचा हा खास प्लॅन नेमका काय आहे, वाचा सविस्तर
भारत आणि दक्षिण आफ्रिका यांच्यातील कसोटी मालिकेएका दिवसावर येऊन ठेपली आहे. दोन सामन्यांच्या कसोटी मालिकेतील पहिला सामना २६ डिसेंबर रोजी होणार आहे. या मालिकेतील पहिला सामना सेंच्युरियन येथील सुपरस्पोर्ट्स पार्क येथे खेळवला जाईल. आता या सामन्यासाठी दोन्ही संघांचे खेळाडू सज्ज झाले आहेत. त्याचबरोबर विराट कोहलीनेही दक्षिण आफ्रिकेच्या वेगवान गोलंदाजांना तोंड देण्यासाठी खास रणनिती आखली आहे. या रणनितीला अनुसरून विराट कोहलीने आज नेट्समध्ये सराव केला.
विराटचा स्पेशल सराव
विराट कोहलीने २४ तारखेला झालेल्या सराव सत्रात नेटमध्ये जोरदार फलंदाजी केली. सेंच्युरियनमध्ये दक्षिण आफ्रिकेच्या वेगवान गोलंदाजांचा सामना करण्यासाठी विराट कोहलीने आज छोट्या खेळपट्टीवर सराव केला. दक्षिण आफ्रिकेच्या वेगवान गोलंदाजांच्या उसळत्या चेंडूंचा सामना करण्यासाठी विराटने छोट्या खेळपट्टीवर सराव केला आहे.
कोहलीने नेट्समध्ये १८ यार्डच्या खेळपट्टीवर सराव केला. सहसा खेळपट्टी २२ यार्डची असते आणि सरावातही आपण या अंतरावरून गोलंदाजी करतो. पण कोहलीने १८ यार्ड्सवरून गोलंदाजी करवून सराव केला. सोशल मीडियावर अशा बातम्या येत आहेत ज्यात स्टार स्पोर्ट्सचा हवाला दिला जात आहे. स्टार स्पोर्ट्स या मालिकेचे अधिकृत प्रसारक आहे.
विराट कोहली आता पहिली कसोटी जिंकण्यासाठी सज्ज झाला आहे. एकदिवसीय विश्वचषक २०२३ नंतर विराट कोहली आता दक्षिण आफ्रिकेसोबत कसोटी मालिकेत खेळताना दिसणार आहे. कसोटी मालिकेत विराट कोहलीच्या खांद्यावर मोठी जबाबदारी असेल.
१८ यार्डच्या खेळपट्टीवर का केला सराव?
द्रविड यांनी आफ्रिकेच्या दौऱ्यावर जाण्यापूर्वीच म्हटलं होतं की येथील खेळपट्ट्यांवर फलंदाजांना फलंदाजीसाठी खूप कष्ट घ्यावे लागणार आहेत. दक्षिण आफ्रिकेच्या खेळपट्ट्यांमध्ये भरपूर उसळी आहे. याशिवाय, चेंडू येथे सीम आणि स्विंगही चांगला होतो. दक्षिण आफ्रिकेकडे खूप वेगवान गोलंदाजी करणारे गोलंदाज आहेत. या सगळ्याला तोंड देण्यासाठी कोहलीने ही कसरत केली आहे. गोलंदाजाने जवळून गोलंदाजी केल्यास चेंडू अधिक उसळी घेऊन फलंदाजाकडे येईल. तसेच वेगानेही येईल. स्विंग आणि सीम देखील खूप वेगवान असतील. अनेक वेळा या सर्व गोष्टींना सामोरे जाण्यासाठी, चांगला सराव करता यावा म्हणून फलंदाज गोलंदाजाला जवळ गोलंदाजी करण्यास सांगतो. जेणेकरून चांगला सराव करता येईल. मात्र, कधी कधी यामुळे जखमी होण्याची भीती असते. मात्र, योग्य सरावासाठी कोहलीने हा धोका पत्करला.
