मुंबईतील रामटेक बंगल्यावर शिवसेना प्रतिनिधी सभा आज संपन्न झाली. या बैठकीत आगामी लोकसभा निवडणुकीत मिशन-४८ यशस्वी करून महाराष्ट्रातून सर्वाधिक खासदार निवडून आणण्याचा ठराव बहुमताने मंजूर करण्यात आला. तसेच शिवसेनेच्या सदस्य नोंदणी अभियानाचा शुभारंभ देखील यावेळी संपन्न झाला.
यावेळी तीन राज्यातील विधानसभा निवडणुकीत भाजपाला घवघवीत यश मिळाल्याबद्दल पंतप्रधान नरेंद्र मोदीजी आणि गृहमंत्री अमित शहा तसेच भाजपा राष्ट्रीय अध्यक्ष जे. पी. नड्डा यांच्या अभिनंदनाचा प्रस्ताव बहुमताने मंजूर करण्यात आला. राज्य सरकारने आजवर केलेल्या वाटचालीबद्दल सरकारचे अभिनंदन करणारा, जी-२० परिषदेचे यशस्वी आयोजन केल्याबद्दल केंद्र शासनाचे अभिनंदन करणारा असे अन्य तीन ठरावही यासमयी मंजूर करण्यात आले. याशिवाय संघटनात्मक बांधणी करण्याच्या दृष्टीने काही महत्वाचे निर्णयही या बैठकीत घेण्यात आले.
यासोबतच शिवसेनेच्या प्राथमिक सदस्य नोंदणी अभियानाचा शुभारंभही करण्यात आला. यावेळी माझ्या प्रतिकात्मक सदस्य नोंदणी अर्जावर स्वाक्षरी घेऊन या सदस्य नोंदणी अभियानाला सुरुवात केली. तीन प्रकारे सदस्य नोंदणी करता येणार असून त्यात पहिल्या पद्धतीनुसार अर्ज भरून देणे, दुसऱ्या पद्धतीनुसार 7703077030 या मोबाईल क्रमांकावर मिस कॉल देऊन येणाऱ्या लिंक वरील फॉर्म भरून पक्षाचे सदस्यत्व घेणे किंवा तिसऱ्या पद्धतीनुसार क्यूआर कोड स्कॅन करून फॉर्म भरून त्यानंतर ओळखपत्र डाउनलोड करून सदस्यत्व घेणे असे तीन पर्याय उपलब्ध करून देण्यात आले आहेत. जास्तीत जास्त नागरिकांनी शिवसेनेचे प्राथमिक सदस्य व्हावे असे आवाहन यावेळी बोलताना केले.
याप्रसंगी शिवसेना नेते रामदास कदम, आनंदराव अडसूळ, महिला नेत्या सौ.मीना कांबळी, खासदार गजानन कीर्तिकर, खासदार डॉ.श्रीकांत शिंदे, शालेय शिक्षणमंत्री दीपक केसरकर, उद्योग मंत्री उदय सामंत, शिवसेनेचे पक्ष प्रतोद भरतशेठ गोगावले आणि सर्व मंत्री, खासदार, आमदार, नेते उपनेते, प्रमुख पदाधिकारी उपस्थित होते.
