ज्या गाडीने गर्लफ्रेण्ड भेटायला येणार होती त्याच गाडीसमोर उडी घेत एका तरुणाने आपलं आयुष्य संपवलं आहे. जेव्हा या घटनेची माहिती त्या तरुणाच्या कुटुंबीयांना मिळाली तेव्हा त्यांना मोठा धक्का बसला.
एका तरुणाने ट्रेनसमोर उडी घेत आत्महत्या केल्याची धक्कादायक घटना घडली आहे. उत्तर प्रदेशातील झाशीत ही घटना घडली. याच ट्रेनने त्याची गर्लफ्रेण्ड त्याला भेटायला येत होती. मात्र, गर्लफ्रेण्डला तिच्या कुटुंबीयांनी रेल्वे स्टेशनवर पकडले. त्यानंतर कुटुंबीयांनी तरुणाला तुरुंगात पाठवू, अशी धमकी दिली. या सर्व प्रकाराने दुखावलेल्या तरुणाने आत्महत्येसारखं टोकाचं पाऊल उचललं.
या तरुणाचे एका तरुणीसोबत प्रेमसंबंध होते. मुलीला त्याच्यासोबत राहायचे होते. मात्र, मुलीच्या कुटुंबीयांना ते मान्य नव्हते. दरम्यान, मुलगी घरातून पळून गेली. मात्र, तिच्या कुटुंबीयांनी तिला रेल्वे स्थानकावरून पकडून तरुणाला फोन करून तुरुंगात पाठवण्याची धमकी दिली.
राकेश राजपूत असे आत्महत्या करणाऱ्या तरुणाचे नाव आहे. त्याचे वय २० वर्षे होते. तो झाशीच्या प्रेमनगर येथील रहिवासी होता. गेल्या दोन वर्षांपासून त्याचे अलीगड येथील एका तरुणीसोबत प्रेमसंबंध होते. दोघांमध्ये फोनवर दररोज बोलणं होत होतं. मुलीने अनेकदा घरातून पळून झाशीला येण्याचं म्हटलं. पण, राकेश तिला प्रत्येकवेळी नकार देत असे.
मात्र, गुरुवारी (११ जानेवारी) संधीचा फायदा घेत ही तरुणी अलीगड येथील घरुन पळून गेली. झाशीला जाण्यासाठी ती रेल्वे स्टेशनवर पोहोचली. याबाबत रात्रीच राकेशसोबत बोलली होती. मात्र, मुलीच्या कुटुंबीयांना याची माहिती मिळाला. त्यांनी तरुणीला रेल्वे स्टेशनवर पकडलं आणि राकेशला फोन करून धमकावलं.
घरच्यांच्या धमक्या आणि गर्लफ्रेण्ड येऊ न शकल्याचं दु:ख राकेशला सहन झालं नाही. त्याने ट्रेनसमोर उडी घेत आत्महत्या केली. राकेशने त्याच ट्रेनसमोर उडी घेत आत्महत्या केली ज्याने त्याची गर्लफ्रेण्ड झाशीला येणार होती. सध्या पोलिसांनी राकेशचा मृतदेह ताब्यात घेऊन पोस्टमार्टमसाठी पाठवला आहे. या घटनेने त्याच्या कुटुंबाला मोठा धक्का बसला आहे.
