प्रजासत्ताकदिनाच्या पूर्वसंध्येला ८० लष्करी अधिकारी व जवानांना शौर्य पदके जाहीर करण्यात आली. देशाच्या तिन्ही सैन्यदलांच्या सरसेनापती असणाऱ्या राष्ट्रपती द्रौपदी मुर्मू यांनी या पदकांना गुरुवारी मंजुरी दिली. त्यामध्ये सहा जणांना कीर्तिचक्र हे शांततेच्या काळातील दुसरे सर्वोच्च पदक जाहीर करण्यात आले असून, त्यातील तिघांना हा सन्मान मरणोत्तर देण्यात येणार आहे. त्याखेरीज ३११ जणांना उल्लेखनीय सेवेसाठी पदके जाहीर करण्यात आली आहेत.
कीर्तिचक्र विजेते – मेजर दिग्विजयसिंह रावत (२१वी बटालियन, पॅराशूट रेजिमेंट, स्पेशल फोर्सेस), मेजर दीपेद्र विक्रम बसनेत (चौथी बटालियन, शीख रेजिमेंट), कॅप्टन अंशुमनसिंह, मरणोत्तर (आर्मी मेडिकल कोअर, २६वी बटालियन, पंजाब रेजिमेंट), हवालदार पवनकुमार यादव (२१वी बटालियन, महार रेजिमेंट), हवालदार अब्दुल माजिद, मरणोत्तर (नववी बटालियन, पॅराशूट रेजिमेंट, स्पेशल फोर्सेस), शिपाई पवनकुमार, मरणोत्तर (ग्रेनेडियर्स, ५५वी बटालियन, राष्ट्रीय रायफल्स).
याखेरीज राष्ट्रपतींनी ८४ मेन्शन इन डिस्पॅचही मंजूर केली आहेत. त्यात ऑपरेशन कावेरी, ऑपरेशन रक्षक, ऑपरेशन स्नो लेपर्ड, ऑपरेशन मेघदूत आदी मोहिमांतील अधिकारी, कर्मचाऱ्यांचा समावेश आहे.
सावंत, सारापुरे यांना सेना मेडल
नायब सुभेदार पवन सावंत, शिपाई चेतन कल्लाप्पा सारापुरे यांना सेना मेडलने (शौर्य पदक) गौरविण्यात आले. सावंत सध्या राष्ट्रीय रायफल्सच्या ग्रेनेडियर्समध्ये ३९व्या बटालियनमध्ये नियुक्तीस आहेत. सारापुरे महार रेजिमेंटमधील ४५व्या बटालियनमध्ये राष्ट्रीय रायफल्समध्ये नियुक्तीस आहेत.
अन्य पदके अशी :
शौर्यचक्र – १६ (दोन मरणोत्तर)
सेना मेडल – ५३ (सात मरणोत्तर)
नौसेना मेडल (शौर्य) – १
वायूसेना मेडल (शौर्य) – ४
