सोलापूर , 3 फेब्रुवारी (हिं.स.) सोलापूर अन् बारामतीला मंजूर झालेले मिलेट सेंटर वेगवेगळे आहेत. एखाद्या ठिकाणी मंजूर झालेले प्रकल्प पळवून नेण्याचा स्वभाव माझ्या रक्तात नाही, असे सांगत उपमुख्यमंत्री अजित पवार यांनी सोलापूर अन् बारामती मिलेट सेन्टर प्रकरणावर पडदा टाकण्याचा प्रयत्न केला.परंतु, पत्रकारांनी मिलेट सेंटरच्या जीआरचा उल्लेख केला.
जीआर वाचल्यानंतर सोलापूरचे प्रकल्प बारामतीला गेल्याची माहिती निदर्शनास आणून दिली. त्यानंतर, अजित पवार यांनी जीआर दुरुस्ती करायला लावू असे सांगत वेळ पडल्यास बारामतीचे सेंटर रद्द करण्याची तयारी देखील त्यांनी दाखवली. उपमुख्यमंत्री अजित पवार हे शनिवारी सोलापूर दौऱ्यावर होते. सकाळी साडे दहा वाजता नियोजन भवनात पाणी व चारा टंचाई संदर्भात बैठक घेतली. बैठकीनंतर त्यांनी पत्रकारांशी संवाद साधला. यावेळी त्यांनी मिलेट सेंटर बद्दल माहिती दिली.
