नारायण राणे यांना मी शेवटचं माफ करतो. मात्र इथून पुढे काही बोलले तर मी त्यांचं वय वगैरे काही पाहणार नाही. निलेश राणे यांना सांगणं आहे की, तुम्ही नारायण राणेंना थांबवा. कारण मलासुद्धा काही मर्यादा आहेत, असं मनोज जरांगे पाटील म्हणाले.
मराठा आरक्षणाच्या आंदोलनाचं नेतृत्व अण्णासाहेब पाटील यांच्यानंतर समर्थपणे पेलणाऱ्या मनोज जरांगे पाटील यांच्या भूमिकांवर प्रश्नचिन्ह उपस्थित करणाऱ्या केंद्रीय मंत्री नारायण राणे यांच्यावर मराठा समाजबांधव तीव्र शब्दात टीका करत असतानाच जरांगे यांनीही आक्रमक होत ‘इथून पुढे बोलाल तर वय वगैरे बघणार नाही, मग मी जाहीर पाणउतारा करेन’, अशा शब्दात रोखठोक इशारा दिला.
मनोज जरांगे यांनी पंतप्रधान मोदींवर टीका केल्याचा राग मनात धरून नारायण राणे यांनी त्यांना सुनावलं होतं. पंतप्रधान जेव्‍हा महाराष्‍ट्रात येतील त्‍यावेळी जागेवरुन हलून दाखव, तुला असली मराठ्यांची ताकद दाखवून दिली जाईल. आपली औकात ओळखावी आणि अंथरुणावर पडून राहून नाटकं करावी, अशा शब्दात राणेंनी जरांगे यांच्यावर टीका केली होती. याच टीकेला आज घेतलेल्या पत्रकार परिषदेतून मनोज जरांगे यांनी प्रत्युत्तर दिलं.
काहीही बरळत असाल तर मी सोडणार नाही
जरांगे म्हणाले, “मी राणेंच्या वयाचा आदर करतो. मी त्यांना आतापर्यंत कधी बोललो नाही. परंतु, ते जर असं काही बरळत असतील तर मी पुढच्या वेळी त्यांना सोडणार नाही. निलेश राणेंना सांगतो, त्यांना थांबवा, त्यांची तयारी असेल तर आम्ही पण तयार आहोत. ते जर मला चॅलेंज देतील, तर त्यांना समजेल काय होईल ते”
मोदींना देखील ओबीसी असल्याचा अभिमान, मग तुम्हाला काय झालंय?
माजी खासदार निलेश राणेंना माझं सांगणं आहे, नारायण राणे साहेबांना थांबवा, मला पण काहीतरी मर्यादा आहेत. नरेंद्र मोदी साहेबांना सुद्धा ओबीसी असल्याचा अभिमान आहे. तुमच्याबद्दल आम्ही काय बोललो का? तुम्हाला मराठा असल्याचा अभिमान हवा होता. आम्हाला स्वाभिमान आहे, तुम्ही आमची बाजू घेण्याऐवजी आमच्यावर टीका करताय. आता जर तुम्ही बोलाल तर मी धुवून काढेन, पाणउतारा करेन. कारण शेवटी मलाही काही मर्यादा आहेत, असा इशाराच त्यांनी राणेंना दिला.
नारायण राणे काय म्हणाले होते?
मोदींना महाराष्‍ट्रात फिरु देणार नाही अशी बेताल बडबड त्याने केली. त्याने आता मर्यादा ओलांडली आहे. पंतप्रधान जेव्‍हा महाराष्‍ट्रात येतील त्‍यावेळी जागेवरुन हलून दाखव, तुला असली मराठ्यांची ताकद दाखवून दिली जाईल. आपली औकात ओळखावी आणि अंथरुणावर पडून राहून नाटकं करावी!
