बंगळुरुच्या प्रसिद्ध रामेश्वरम कॅफेमध्ये शुक्रवारी झालेल्या ब्लास्टमध्ये ९ जण जखमी झाले. कर्नाटकचे पोलिस महासंचालक आलोक मोहन यांनी सांगितलं की हा एक बॉम्ब ब्लास्ट होता. ज्याने कोणी हे घडवून आणलं आहे आम्ही त्याला शोधून काढू असंही ते म्हणाले. याप्रकरणी एनआयए आणि आयबीला माहिती देण्यात आली आहे.
रामेश्वरम कॅफे हा बंगळुरुतील एक प्रसिद्ध कॅफे आहे. हा कॅफे वाइटफील्डच्या ब्रुकफील्ड परिसरात आहे. हे शहरातील बिझनेस सेंटर आणि प्रसिद्ध टेक हब आहे. येथे झालेल्या ब्लास्टने जर्मन बेकरी ब्लास्टच्या धडकी भरवणाऱ्या आठवणी जाग्या झाल्या. कर्नाटकचे मुख्यमंत्री सिद्धारमैया यांनी सांगितलं की, ‘सीसीटीव्ही फुटेजचा तपास केला जात आहे. हा एक आयइडी ब्लास्ट असल्याची माहिती आहे. तपास सुरु आहे. कॅफेच्या कॅशियरची चौकशी केली जात आहे. कारण, एका व्यक्तीने कॅशियरकडून टोकन घेतलं आणि काहीतरी खाल्ल, त्यानेच बॅग ठेवली’.
रवा इडली खाल्ली मग बॅग ठेवून निघाला
पोलिसांनी दिलेल्या माहितीनुसार, १ महिला ६ लोकांसोबत कॅफेमध्ये बसली होती. तेवढ्यात तिच्या मागे ठेवलेल्या बॅगचा स्फोट झाला. सुरुवातीच्या तपासात असं समोर आलं की कथित आरोपी हा २५-३० वर्षांचा आहे. कॅफे आणि आसपासच्या परिसरातील सीसीटीव्ही फुटेजचा तपास करणाऱ्या एका वरिष्ठ पोलिस अधिकाऱ्याने दिलेल्या माहितीनुसार, कथित आरोपी हा रेस्टॉरंटजवळ एका बसमधून उतरताना आणि पुढे चालताना दिसत आहे. त्याच्या चेहऱ्यावर मास्क होता. तो कॅफेमध्ये आला. इथे त्याने कॅश काऊंटरवर पेमेंट केला आणि रवा इडलीचं टोकन घेतलं. इडली खाल्ल्यानंतर त्याने कचरापेटीजवळ एक बॅग सोडली आणि बाहेर निघून गेला.
बॅग ठेवल्याच्या तासाभरात ब्लास्ट
आरोपीने कॅफेमध्ये सात मिनिटं घालवले. तो बाहेर पडल्याच्या जवळपास तासाभरात बॉम्ब ब्लास्ट झाला. मिळालेल्या माहितीनुसार, रामेश्वरम कॅफेत झालेल्या या ब्लास्टमध्ये टायमर बॉम्बचा वापर करुन स्फोट करण्यात आला.
आरोपीला पकडण्यासाठी आठ पथकं
या आरोपीची ओळख पटवण्यासाठी आणि त्याला पकडण्यासाठी आठ पथकं तयार करण्यात आली आहेत. सीसीटीव्ही फुटेजमध्ये कैद झालेल्या फोटोच्या आधारे एआयच्या मदतीने आरोपीचा फोटो तयार केला जाईल. याप्रकरणाच्या चौकशीची जबाबदारी सीसीबीवर सोपवण्यात आली आहे. ते पुढील एक-दोन दिवसात आरोपीला अटक करतील अशी अपेक्षा आहे, असं कर्नाटकचे उपमुख्यमंत्री डीके शिवकुमार यांनी सांगितलं.
