चंदिगढ: हरियाणात मोठ्या राजकीय घडामोडीनंतर नवीन सरकार स्थापन होणार आहे. मुख्यमंत्री मनोहर लाल खट्टर यांनी त्यांच्या पदाचा राजीनामा दिल्यानंतर विधिमंडळ पक्षाची बैठक झाली. त्यात विधिमंडळ गटनेते म्हणून नायब सैनी यांचं नाव निश्चित झालं. नायब सैनी हरियाणाचे पुढचे मुख्यमंत्री असतील. आज संध्याकाळी त्यांचा शपथविधी होईल. राजभवनात शपथविधीची तयारी सुरू झाली आहे.
हरियाणात भाजप आणि जननायक जनता पक्षाची युती होती. जजपचे दुष्यंत चौटाला खट्टर सरकारमध्ये उपमुख्यमंत्री होते. पण लोकसभेच्या जागावाटपावरुन दोन्ही पक्षांमध्ये वितुष्ट निर्माण झालं. जजपनं राज्यात १ ते २ जागांची मागणी केली. पण भाजप त्यांच्यासाठी एकही जागा सोडण्यास तयार नव्हता. राज्य भाजप ते केंद्र भाजपपासून सगळ्यांनीच जजपला जागा सोडण्याविरोधात भूमिका घेतली. त्यामुळे युती संपुष्टात आली.
नायब सैनी हरियाणाचे मुख्यमंत्री असतील. त्यांच्या मंत्रिमंडळात काही अपक्ष आमदारांना स्थान दिलं जाऊ शकतं. जजपसोबतची युती तुटल्यानं अपक्षांचा पाठिंबा भाजपसाठी महत्त्वाचा असेल. त्यांच्याच पाठिंब्यामुळे भाजपचं सरकार स्थापन होणार आहे. दुसरीकडे युती तुटल्यानंतर दुष्यंत चौटाला यांना धक्के बसण्याची दाट शक्यता आहे. त्यांच्या पक्षात फूट पडू शकते. जजपचे देवेंद्र बबली यांच्यासह ५ ते ६ आमदार भाजपसोबत जाऊ शकतात.
कोण आहेत नायब सिंह सैनी?
नायब सैनी यांच्याकडे २०२३ मध्ये हरियाणाच्या प्रदेशाध्यक्षपदाची जबाबदारी सोपवण्यात आली. ऑक्टोबरमध्ये त्यांच्याकडे प्रदेशाध्यक्षपद दिलं गेलं. यानंतर अवघ्या पाचच महिन्यांत त्यांना मुख्यमंत्रिपदी संधी दिली गेली आहे. भाजपनं राजकीय समीकरणांचा विचार करुन सैनी यांच्याकडे राज्याचं नेतृत्त्व दिलं आहे. सैनी ओबीसी समाजातून येतात. ते माजी मुख्यमंत्री खट्टर यांचे निकटवर्तीय मानले जातात.
नायब सध्या कुरुक्षेत्र लोकसभा मतदारसंघाचे खासदार आहेत. त्याआधी ते आमदार होते. २०१४ मध्ये त्यांनी अंबाला जिल्ह्यातील नारायणगढ मतदारसंघातून विधानसभा निवडणूक जिंकली. ते २४ हजार मतांनी विजयी झाले होते. त्यानंतर ते खट्टर सरकारमध्ये मंत्री झाले. २०१९ च्या लोकसभा निवडणुकीत भाजपनं त्यांना कुरुक्षेत्रमधून संधी देत सगळ्यांनाच आश्चर्याचा धक्का दिला. सैनी यांनी संघटनेनं त्यांच्यावर दाखवलेला विश्वास खरा ठरवला. ते जवळपास सात लाख मतांनी विजयी झाले.
