नागपुरात सुरू असलेल्या राष्ट्रीय स्वयंसेवक संघाच्या अखिल भारतीय प्रतिनिधी सभेत दत्तात्रेय होसाबळे यांची पुन्हा सरकार्यवाह म्हणून निवड करण्यात आली आहे. सरकार्यवाहचा कार्यकाळ 3 वर्षांचा असतो. त्यामुळे दत्तात्रय होसबळे 2027 पर्यंत या पदावर राहणार आहेत.
नागपुरात 15 मार्चपासून सुरू असलेल्या प्रतिनिधी सभेच्या बैठकीचा रविवारी समारोप झाला. यावेळी संघ परिवारातील 36 संघटनांच्या सुमारे 1500 प्रतिनिधींनी एकमताने दत्तात्रेय यांची पुढील 3 वर्षांसाठी पुन्हा एकदा सरकार्यवाह म्हणून निवड केली आहे. होसाबळे हे 2021 पासून सरकार्यवाहची जबाबदारी सांभाळत होते. यापूर्वी सरकार्यवाहपदाचे दायित्व भैय्याजी जोशी यांच्याकडे होते. राष्ट्रीय स्वयंसेवक संघामध्ये जिल्हा संघचालक, विभाग संघचालक, प्रांत संघचालक, क्षेत्र संघचालक तसेच सरकार्यवाह यांची निवड करण्यासाठी दर 3 वर्षांनी निवडणूक प्रक्रिया घेतली जाते. मग हे लोक त्यांच्या कार्यकारिणीची घोषणा करतात, जी पुढील 3 वर्षांसाठी काम करते.
आवश्यकतेनुसार, यादरम्यान काही पदांमध्येही बदल करण्यात आले आहेत. प्रतिनिधी सभेच्या बैठकीत क्षेत्र प्रचारक आणि प्रांतीय प्रचारकांच्या जबाबदाऱ्यांमध्येही बदल होतात.प्रतिनिधी सभा हा संघातील निर्णय घेणारा विभाग आहे. जगातील सर्वात मोठ्या खासगी संघटना असलेल्या संघातील सरकार्यवाह पदासाठीची निवडणूक अत्यंत सोप्या पद्धतीने केली जाते. या निवडणूक प्रक्रियेत संपूर्ण केंद्रीय कार्यकारिणी, प्रदेश आणि प्रांतातील संघ नेते, कार्यवाह आणि प्रचारक आणि संघाच्या सक्रिय स्वयंसेवकांनी निवडून दिलेले प्रतिनिधी यांचा सहभाग असतो. तेच सहकारी अधिकाऱ्यांची निवड करतात. अशाच पद्धतीने दत्तात्रय होसबळेंची दुसऱ्यांदा सरकार्यवाहपदी निवड झालीय.
दत्तात्रेय होसाबळे हे कर्नाटकातील शिमोगा येथील रहिवासी आहेत. 1 डिसेंबर 1955 रोजी जन्मलेल्या होसाबळे यांनी 1968 मध्ये वयाच्या अवघ्या 13 व्या वर्षी संघात प्रवेश केला. त्यानंतर 1972 मध्ये अखिल भारतीय विद्यार्थी परिषदेत (अभाविप) सामील झाले. होसाबळे यांनी बंगळुरू विद्यापीठातून इंग्रजी भाषेत पदव्युत्तर शिक्षण घेतले आहे. दत्तात्रय होसाबळे हे अभाविप कर्नाटकचे राज्य संघटन मंत्री होते.
यानंतर ते अभाविपचे राष्ट्रीय मंत्री आणि सहसंघटन मंत्री होते. होसबळे सुमारे 20 वर्षे अभाविपचे राष्ट्रीय संघटन मंत्री होते. यानंतर 2002-03 च्या सुमारास त्यांना संघाचे अखिल भारतीय सह-बौद्धिक प्रमुख बनवण्यात आले. दत्तात्रेय होसाबळे यांना त्यांची मातृभाषा कन्नड व्यतिरिक्त इंग्रजी, तमिळ, मराठी, हिंदी आणि संस्कृतसह अनेक भाषांचे ज्ञान आहे. ते 1975-77 च्या जेपी चळवळीतही सक्रिय होते आणि जवळपास अडीच वर्षे ‘मिसा’ अंतर्गत तुरुंगवासही भोगला. तसेच त्यांनी तुरुंगात 2 हस्तलिखित मासिकांचे संपादनही केले आहे.
