दिग्गज नेत्यांची मोठी परंपरा असलेला सांगली जिल्हा गेल्या दशकापर्यंत काँग्रेसचा बालेकिल्ला मानला जात असे. मात्र, गेल्या दोन निवडणुकांमध्ये सलग पराभव झाल्याने ही वीण उसवली. आता भाजपकडून विद्यमान खासदार संजय काका पाटील रिंगणात असून, महाविकास आघाडीत मात्र काँग्रेस आणि शिवसेनेत दोन पाटलांच्या नावांवरून चुरस आहे.
सन १९६२ पासून २०१४ पर्यंत काँग्रेसने या मतदारसंघाचे प्रतिनिधित्व केले. अगदी आणीबाणीनंतर देशभर काँग्रेसची पडझड झाली, तेव्हाही सांगलीत काँग्रेसचा खासदार निवडून आला होता. तसेच राष्ट्रवादी काँग्रेसच्या स्थापनेनंतरही जिल्ह्यात आठपैकी पाच आमदार आणि खासदार काँग्रेसचाच होता; परंतु २०१४ मध्ये मोदी लाटेत हा बालेकिल्ला ढासळला. काँग्रेसचे तत्कालीन केंद्रीय राज्यमंत्री आणि माजी मुख्यमंत्री वसंतदादा पाटील यांचे नातू प्रतीक पाटील यांचा भाजपचे संजय पाटील यांनी मोठ्या फरकाने पराभव केला. २०१९च्या निवडणुकीतही खासदार संजय पाटील यांना ही निवडणूक जड जाईल, असा अंदाज भाजपला वेळीच आला असावा. धनगर समाजाच्या आरक्षणाचा मुद्दा ऐरणीवर आला होता. भाजपने युती सरकार सत्तेवर आल्यास पहिल्या बैठकीत धनगर समाजाला आरक्षण देण्याचा शब्द दिला होता.
मात्र, पाच वर्षांतही तो पूर्ण न झाल्याने समाज नाराज झाला. याचा अंदाज घेऊन भाजप नेते गोपीचंद पडळकर यांनी हा मुद्दा घेऊन रान उठवले होते आणि वंचित बहुजन आघाडीच्या वतीने ते रिंगणात उतरले. काँग्रेसचे तगडे उमेदवार म्हणून चर्चा सुरू असतानाच विशाल पाटील यांना ऐन वेळी राजू शेट्टी यांच्या स्वाभिमानी पक्षाची बॅट हातात घ्यावी लागली. नाराज धनगर समाजाची मते विभागली गेल्याने तिरंगी लढतीत संजय पाटील यांचा विजय झाला. या निवडणुकीत विजयी उमेदवार संजय पाटील यांना ५,०८९९५ मते मिळाली. विशाल पाटील यांना ३,४४६४३ तर गोपीचंद पडळकर यांना ३,००२३४ मते मिळाली. गेल्या निवडणुकीत एकूण ६५ टक्के मतदान झाले होते. त्यापैकी संजय पाटील यांना ४३.०१, विशाल पाटील यांना २९.१२ तर पडळकर यांना २५.३७ टक्के मते मिळाली होती. यंदा संजय पाटील तिसऱ्यांदा रिंगणात उतरले आहेत. दहा वर्षाच्या काळात गावागावांत आपला गट केला असला, तरी स्वपक्षातील लोकप्रतिनिधी आणि पदाधिकारी यांचा विरोध असल्याचे दिसून येत आहे.
आघाडीत रस्सीखेच
यंदा काँग्रेसकडून विशाल पाटील रिंगणात येणार, अशी खात्री काँग्रेसजन देत होते. मात्र, दुहेरी महाराष्ट्र केसरी चंद्रहार पाटील यांनी शिवसेनेत प्रवेश केल्यानंतर त्यांची उमेदवारीही उद्धव ठाकरे यांनी जाहीर केली. मात्र, काँग्रेस या जागेबाबत प्रचंड आग्रही असून कोणत्याही परिस्थितीत काँग्रेसच लढणार, अशी एकमुखी भूमिका सर्वच नेत्यांनी घेतल्याने आघाडीत पेच निर्माण झाला आहे. मात्र, लोकसभेत विजय मिळाल्यास जिल्ह्यात काँग्रेसला उभारी मिळेल, अशी आशा काँग्रेसच्या कार्यकर्त्यांना आहे. शेजारील कोल्हापूरची जागा काँग्रेसला गेल्यानंतर शिवसेनेने सांगलीचा आग्रह धरल्याचे सांगण्यात येते.
साखर कारखान्यांचे मोठे जाळे असलेल्या सांगली जिल्ह्यात प्राक्षे, बेदाणा आणि हळद ही मुख्य पिके आहेत. दुसराकडे जिल्ह्यातील मोठा भाग कोरडवाहू असल्याने पिण्याच्या पाण्यासह शेतीचीही समस्या आहे. ताकारी, म्हैसाळ, टेंभू, आरफळ अशा कृष्णा नदीतून पाणी उपसा करून दुष्काळी भागाला देणाऱ्या योजनांपैकी काही योजनाचे काम बाकी आहे. सध्या सुमारे दोन लाख नागरिकांना टँकरद्वारे पिण्याचे पाणी द्यावे लागत आहे. सांगलीला विमानतळ नाही. ड्रायपोर्टची चर्चा झाली होती, पण पुढे हा प्रकल्प रद्द झाल्याने नागरिकांमध्ये नाराजी आहे.
सांगली, मिरज, पलूस-कडेगाव, तासगाव-कवठे महांकाळ, खानापूर आणि जत आदी विधानसभा मतदारसंघ या लोकसभा मतदारसंघात आहेत. यापैकी दोन आमदार भाजपचे, दोन काँग्रेसचे, एक राष्ट्रवादी (शरद पवार गट) आणि एक शिवसेनेच्या शिंदे गटाचा आहे. सांगलीत एकूण १८,३८,८०३ मतदार आहेत.
२०१९मधील निवडणुकीतील चित्र
– संजय पाटील – भाजप – ५,०८९९५
– गोपीचंद पडळकर – वंचित बहुजन आघाडी – ३,००, २३४
