मध्य प्रदेशातील धार जिल्ह्यातील वादग्रस्त भोजशाळा-कमल मौला मशीद परिसर हे आधी सरस्वती मंदिर होते. नंतर त्याचे मुस्लीमधर्मीयांच्या प्रार्थनास्थळात रूपांतर झाले, असा दावा प्रख्यात पुरातत्वशास्त्रज्ञ के. के. मुहम्मद यांनी केला आहे. हिंदू आणि मुस्लिमांनी न्यायालयाने दिलेल्या निकालाचे पालन केले पाहिजे आणि प्रार्थनास्थळ कायदा १९९१ चा सन्मान केला पाहिजे. अशा ठिकाणांबाबत असणारे मतभेद दूर करण्यासाठी त्यांनी एकत्र बसले पाहिजे. मथुरा आणि काशी या दोन्ही ठिकाणांबाबतच्या हिंदूंच्या भावनांचा मुस्लिमांनी आदर करायला हवा, या मुद्द्यावर त्यांनी भर दिला.
मध्य प्रदेश उच्च न्यायालयाने दिलेल्या आदेशानंतर, भारतीय पुरातत्व सर्वेक्षण (एएसआय) मध्य प्रदेशच्या आदिवासीबहुल जिल्ह्यातील वादग्रस्त भोजशाळा संकुलाचे सर्वेक्षण करीत आहे. हे वागदेवी देवीचे (सरस्वती) मंदिर असल्याची हिंदूंची श्रद्धा आहे तर मुस्लीमधर्मीय या भागाला कमाल मौला मशीद असे म्हणतात. ‘धार भोजशाळाबाबतचे ऐतिहासिक सत्य असे आहे की ते सरस्वती मंदिर होते. नंतर त्याचे रुपांतर मशिदीत करण्यात आले. परंतु, प्रार्थना स्थळ कायदा १९९१ नुसार कालमर्यादेचे वर्ष १९४७ आहे. जर १९४७ मध्ये तिथे मंदिर असेल, तर ते मंदिर आहे आणि जर तिथे मशीद असेल तर ती मशीद आहे. दोन्ही बाजूंनी या कायद्याचा मान राखवा’, असे पुरातत्त्व खात्याचे माजी अधिकारी मुहम्मद म्हणाले.
१९७६-७७ मध्ये प्रोफेसर बी. बी. लाल यांच्या नेतृत्वाखाली अयोध्येत पहिल्यांदा जे उत्खनन करण्यात आले, त्या पथकात मुहम्मद यांचा समावेश होता. ‘याबाबतची सर्व तथ्ये विचारात घेऊन उच्च न्यायालय यावर निर्णय घेईल. सर्वांनी या निर्णयाचा आदर करावा हाच एकमेव पर्याय आहे’, असेही मुहम्मद म्हणाले.
