सोलापूर लोकसभा मतदारसंघात मराठा समाज आक्रमक झाला आहे. भाजपचे राम सातपुते यांचा मोहोळ तालुक्यातील वडवळ येथे चले जावच्या घोषणा देत कार्यक्रम उधळून लावला. तर मोहोळ तालुक्यातील खंडाळी गावात भाजपच्या पदाधिकाऱ्यांसमोर निषेधार्थ घोषणाबाजी करण्यात आली. मराठा समाजाचा रोष पाहता राम सातपुते यांनी वडवळ गावात येण्याचे टाळले. मात्र त्यांच्या ताफ्यातील इतर वाहनांमध्ये बसलेल्या भाजपच्या कार्यकर्त्यांना रोषाला सामोरे जावे लागले. तसेच मोहोळमध्ये भाजप मेळाव्यात बोलताना मराठा समाजाने असे करायला नाही पाहिजे होते, असे वक्तव्य केल्याने खंडाळी गावात भाजपच्या निषेधार्थ घोषणाबाजी करण्यात आली.
भारतीय जनता पक्षाचे उमेदवार राम सातपुते यांच्या विरोधात मराठा समाज आक्रमक झाला आहे. सोलापूर लोकसभेचे उमेदवार आमदार राम सातपुते यांच्या मोहोळ तालुक्यातील वडवळ येथील प्रचाराच्या शुभारंभाच्या कार्यक्रमाला तीव्र विरोध करण्यात आला. तर मोहोळ येथील भाजप कार्यकर्त्यांच्या मेळाव्यात भाजपचे पदाधिकारी शंकर वाघमारे यांनी केलेल्या विधानाचा खंडाळी येथे निषेध मराठा समाजाकडून करण्यात आला. त्यामुळे भाजप उमेदवार सातपुते यांच्या अडचणी वाढण्याची शक्यता आहे.
भाजप आमदार राम सातपुते यांच्या प्रचाराचा मोहोळ तालुक्यातील वडवळ येथील श्री नागनाथ मंदिरात शुभारंभ करण्यात येणार होता. राम सातपुते येणार आहेत, याची कुणकुण लागताच मराठा समाज बांधव सोमवारी सकाळपासूनच मंदिर परिसरात जमू लागले होते. सातपुते वडळवमध्ये पोहोचण्यापूर्वी जिल्हा परिषदेचे माजी सभापती विजयराज डोंगरे हे कार्यक्रमस्थळी पोहचले होते. त्यावेळी त्यांना मराठा समाज बांधवांच्या रोषाला सामोरे जावे लागले. मराठा समाज बांधवांची आक्रमकता पाहून राम सातपुते यांनी वडवळला येण्याचे टाळले. त्यावरही मराठा समाजाकडून टीका करण्यात आली. आमच्या भावना समजून घेण्यासाठी सातपुते यांनी वडवळमध्ये यायला हवे होते, असे मराठा समाजातील नागरिकांनी भावना व्यक्त केली.
मराठा समाजाचे समन्वयक ॲड श्रीरंग लाळे यांनी खंडाळी येथे बोलताना तीव्र शब्दांत संताप व्यक्त केला. भाजपचे मोहोळमधील शंकर वाघमारे यांनी वडवळच्या मराठा समाजाच्या आंदोलनाच्या अनुषंगाने वडवळमध्ये मराठा समाजाने तमाशा मांडला, गोंधळ घातला, असे विधान केले होते. अंतरवाली सराटीतील लाठीहल्ल्यानंतरही मराठा समाज संविधानिक मार्गाने आंदोलन करत होता. त्यानंतरही भाजप पदाधिकारी शंकर वाघमारे यांनी भाजप कार्यकर्त्यांच्या मोहोळच्या मेळाव्यात मराठा समाजाने आंदोलनाच्या माध्यमातून तमाशा मांडला, असे विधान केले आहे, त्याचा खंडाळी येथे मराठा बांधवांनी जाहीर निषेध केला.
