कोकणातील जैतापूरच्या अणुऊर्जा प्रकल्पाला ही विरोध केला. त्या ठिकाणी स्फोट होईल म्हणून सांगितलं. पण ही चिंता करणाऱ्यांना हे माहित नाही का की डॉ. भाभा अणू ऊर्जा रिसर्च सेंटर हे मुंबईत आहे. कोकणामध्ये प्रकल्प येऊ द्यायचा नाही ही उद्धव ठाकरे यांची भूमिका होती. नाणार रिफायनरीलाही यांच्या खासदाराने विरोध केला. मग बारसूला यांना ५००० एकर जमीन सापडली. या सगळ्या मागे यांचेच जमिनीचे व्यवहार आहेत. आधी प्रकल्पाला विरोध करायचा मग जमिनीचे दर वाढवायचे, अशा प्रकारचे हेच सगळे प्रकार यांचे सुरू आहेत. या सगळ्या प्रकारांना तुम्ही बळी पडणार आहात का? असा खडा सवालच राज ठाकरे यांनी उपस्थित करत उद्धव ठाकरे तसेच गटाचे खासदार विनायक राऊत यांचाही राज ठाकरे यांनी समाचार घेतला आहे. ते कणकवलीत बोलत होते.
रत्नागिरी सिंधुदुर्ग लोकसभा मतदारसंघाचे महायुतीचे उमेदवार केंद्रीय मंत्री नारायण राणे यांच्या प्रचारासाठी आयोजित सभेत राज ठाकरे बोलत होते. त्यावेळी व्यासपीठावरती केंद्रीय मंत्री आणि उमेदवार नारायण राणे, मंत्री दीपक केसरकर, माजी खासदार निलेश राणे, आमदार नितेश राणे आधी पदाधिकारी मान्यवर उपस्थित होते. उद्धव ठाकरे यांनी राज्यातले उद्योगधंदे गुजरातला जात आहेत म्हणून टीका केली. यावर बोलताना राज ठाकरे म्हणाले, वा रे वा २०१४ ते २०१९ तुम्ही त्यांच्याबरोबर सत्तेत बसला होता. २०१९ ते नंतर अडीच वर्ष तुम्ही मुख्यमंत्री होतात. म्हणजे या महाराष्ट्रातील एकूण साडेसात वर्ष उद्धव ठाकरे सत्तेत होते. मग उद्योगधंदे बाहेर का गेले, असा सवालच राज ठाकरे यांनी उद्धव ठाकरे यांना केला आहे. उद्योग धंदा आला की यांचा खासदार विरोध करणार आणि आमदार पाठिंबा देणार, अशा शब्दात उद्धव ठाकरे यांच्यावर राज ठाकरे यांनी जोरदार टीका केली आहे.
राज ठाकरे म्हणाले, कोण कुठला बाबर आणि आम्ही त्याला जपत बसलो. १९९२ साली बाबरीचा ढाचा पाडला गेला आणि त्यानंतर आज केवळ न्यायालय आणि पंतप्रधान नरेंद्र मोदी यांच्यामुळेच अयोध्येत श्री रामलल्लाचे मंदिरं उभं राहिलं. त्या कारसेवकांच्या आत्म्याला शांती मिळाली. अन्यथा ते शक्य नव्हतं. ज्या गोष्टी योग्य आहेत त्या योग्यच आहेत, असं सांगत पंतप्रधान नरेंद्र मोदी यांच्या कार्याचे कौतुक केले. ज्या गोष्टी आपल्याला २०१४ ते २०१९ या कालावधीत पटल्या नाहीत, त्यावेळेस स्पष्ट बोललो पण जे चांगलं केलं त्याचं कौतुक करायला हवं, अशा शब्दात राज ठाकरे यांनी मोदींच्या कामाचं कौतुक केलं.
काल उद्धव ठाकरे इकडे येऊन गेले. तुमचे जे काही अडीच वर्षाचे झेंगट होतं. समजा भारतीय जनता पक्षाने अडीच वर्ष तुमची मान्य केली असती तर तुम्ही आज इकडे बोलला असतात का, नसता बोललात. कारण सत्तेचा गोळा तोंडात कोंबला असतो, असं म्हणत राज ठाकरे यांनी उद्धव ठाकरे यांचा कोकणातील सिंधुदुर्ग कणकवली येथील सभेत समाचार घेतला आहे. भारतातील नऊ भारतरत्न पैकी सात भारतरत्न कोकणातील आहेत. हा सगळ्या मोठ्या लोकांचा मतदारसंघ आहे, असं म्हणत ठाकरेंनी कोकणच्या भूमीचा गौरव केला. तुम्हाला ज्या कारणासाठी कोकण सोडावं लागतं, विभक्त व्हावं लागतं. ते वर्ग आपल्या कोकणातच मिळालं तर आपल्याला कोकण सोहळ्या जाणार नाही. आपल्याला जे हवं आहे ते कोकणातच मिळेल आणि हे करू शकणाऱ्या फक्त एकमेव माणूस म्हणजे नारायण राणे, असं राज ठाकरे नारायण राणे यांच्या कामाचं कौतुक करताना म्हणाले.
बाळासाहेब मला आम्ही गप्पा मारत असताना नेहमी सांगायचे बॅरिस्टर अंतुले यांच्यानंतर कामासारखा वाघ बघितला असेल तर ते नारायण राणे. त्यांनी ज्या पद्धतीने सहा महिन्याचे मुख्यमंत्री केलं ते आजवर भल्या भल्यानाही जमलं नाही. त्यांना केवळ सहा महिने मिळाले, पाच वर्षे मिळाले असते तर इकडे प्रचारायला येण्याचीच गरज नव्हती. एखादा विषय समजून घेणं तो कसा आकारण्यात त्याची अंमलबजावणी कशी करायची हे नारायण राणेंकडून शिकवा, असं राज ठाकरे म्हणाले.
