लहान मुलांमध्ये सर्दी-खोकल्याचं प्रमाण वाढलं आहे. त्यामुळे आपण सहज त्यांना खोकल्याचं औषध देतो. पण यासंबंधी एक महत्त्वाची बातमी आली असून यावर प्रत्येक पालकाने गांभीर्याने लक्ष देणं महत्त्वाचं आहे. उझबेकिस्तानमध्ये झालेल्या मुलांच्या मृत्यूनंतर जागतिक आरोग्य संघटनेने (WHO) दोन भारतीय खोकल्याच्या सिरपला बंदी घातली आहे. या औषधांच्या वापराविरोधात नागरिकांना इशारा देण्यात आला आहे.
WHO ने दिलेल्या माहितीनुसार, नोएडामध्ये असलेल्या मॅरियन बायोटेक कंपनीने बनवलेले दोन कफ सिरप उझबेकिस्तानमधील मुलांसाठी वापरू नये, असा इशारा देण्यात आला आहे. WHO ने बुधवारी त्यांच्या अधिकृत साईटवरून यासंबंधी अलर्ट जारी केला. Marion Biotechcare कंपनीने तयार केलेली औषधं की निकृष्ट दर्जाची असून त्यांची गुणवत्ता खराब असल्याचं समोर आल्याने हा इशारा देण्यात आला आहे.
अधिक माहितीनुसार, AMBRONOL Syrup आणि DOK-1 Max Syrup. या दोन्ही औषधांचा वापर टाळण्याचा इशारा देण्यात आला आहे. या उत्पादनांची कंपनी Marion Biotech Pvt. Ltd., उत्तर प्रदेशात आहे. त्यामुळे भारतातही नागरिकांनी ही औषधं आपल्या मुलांना देऊ नये, असं बोललं जात आहे.
WHO च्या मते, कफ सिरपच्या नमुन्यांची प्रयोगशाळेत चाचणी केली असता या दोन्ही उत्पादनांमध्ये दूषित पदार्थ म्हणून डायथिलीन ग्लायकोल/ इथिलीन ग्लायकोल असल्याचं समोर आलं. जे लहान मुलांच्या आरोग्यासाठी धोकादायक आहेत. त्यामुळे पालकांनी आपल्या मुलांना कोणतीही औषधं देताना त्याची योग्यता तपासणं महत्त्वाचं आहे.
