लोकसभा निवडणुकीत बीडमध्ये निसटता पराभव पत्करावा लागल्यानंतर पंकजा मुंडे विधानसभा निवडणूक लढवणार असल्याची शक्यता वर्तवली जात आहे. भारतीय जनता पक्षाच्या नेत्या आणि माजी मंत्री पंकजा मुंडेंनी विधानसभा निवडणूक लढवण्याचे संकेत दिले आहेत. त्यामुळे पंकजा मुंडे विधानसभा निवडणुकीच्या तयारीला लागल्याची चर्चा सुरु झाली आहे.
गेल्या वेळी तुम्हाला पाच वर्षे वाट पाहावी लागली. पण आता केवळ तीनच महिने शिल्लक राहिले आहेत, असं मुंडे त्यांच्या समर्थकांशी संवाद साधताना लातूरमध्ये म्हणाल्या. २०१९ मध्ये झालेल्या विधानसभा निवडणुकीत पंकजा मुंडेंचा परळीमध्ये पराभव झाला होता. राष्ट्रवादीच्या धनंजय मुंडेंनी पंकजा यांना पराभवाचा धक्का दिला होता. त्यानंतर भाजपनं मुंडेंना बीडमधून लोकसभेचं तिकीट दिलं. पण नुकत्याच झालेल्या निवडणुकीत त्या पराभूत झाल्या.
लोकसभा निवडणुकीत अतिशय कमी मतांनी पंकजा मुंडेंचा पराभव झाला. तेव्हापासून त्यांचे समर्थक पंकजा यांच्या पुनर्वसनाची मागणी करत आहेत. त्यांच्या काही समर्थकांनी आत्महत्यादेखील केल्या आहेत. निवडणुकीत पराभूत झालेल्या उमेदवारांना भाजप पुन्हा लगेचच निवडणुकीचं तिकीट देत नाही असा इतिहास आहे. पण मुंडे या लोकनेत्या असल्यानं त्या अपवाद ठरु शकतात. पंकजा यांना असलेला जनाधार मोठा आहे.
पंकजा मुंडेंना राज्यसभा किंवा अन्य ठिकाणी संधी देण्यात यावी यासाठी भाजपचे विधान परिषदेचे खासदार सुरेश धस आग्रही आहेत. विधानसभेची निवडणूक अवघ्या काही महिन्यांवर येऊन ठेपली आहे. ही निवडणूक लढवायची असल्यास पंकजा मुंडेंना सुरक्षित मतदारसंघ शोधावा लागेल. आणखी एखाद्या पराभवानं त्यांचं राजकीय भवितव्य धोक्यात येऊ शकतं.
गेल्या विधानसभा निवडणुकीला मुंडेंना परळीत पराभव पाहावा लागला होता. राष्ट्रवादी काँग्रेसचे नेते आणि पंकजा यांचे चुलत बंधू धनंजय मुंडे यांनी त्यांचा पराभव केला होता. महायुतीत राष्ट्रवादीची एन्ट्री झाल्यानं धनंजय मुंडे आता पंकजांसोबत आहेत. पण पंकजा यांना परळीतून तिकीट मिळण्याची शक्यता आहे. नगर जिल्ह्यातील पाथर्डी मतदारसंघाचा विचार मुंडेंसाठी केला जाऊ शकतो.
