तभा वृत्तसेवा मुदखेड :
मुदखेड शहरात युवक काँग्रेसच्या वतीने गेल्या तेरा वर्षापासून सुदृढ बैल जोडी व शेतकऱ्यांचा गौरव सोहळा साजरा करण्याची परंपरा अजूनही कायम असून सर्वधर्म समभावाचा संदेश देत नवचैतन्याचा सोहळा ठरला आहे.
भारतीय संस्कृतीत शेतकऱ्यांसाठी बैलपोळा हा सण सर्वात महत्त्वाचा समजला जातो. कबाड कष्ट करणाऱ्या शेतकऱ्यांना तसेच मानेवर जीवाचे ओझे वाहत कुटुंबाच्या उदरनिर्वाहात मोलाचा वाटा असनाऱ्या बैल राजा तसेच बळीराजाचा गौरव सोहळा झाला पाहिजे ही संकल्पना युवक काँग्रेसने अमलात आणली. कोरोनाच्या दोन वर्षाच्या काळातील खंडानंतर पुन्हा बैलपोळा व गौरव सोहळा जोमात व उत्साहात सुरू करण्याचा निर्णय युवक काँग्रेसचे गिरीश कोतावार, गजानन संबोड, राधेश्याम ढगे, एडवोकेट माणिक पचंलिंग, , यांच्या पुढाकारातून यावर्षी सुरू करण्यात आला.हनुमान मंदिरात सोहळा आयोजित करण्यात येऊन सर्व बैल जोड्यांचे सामूहिकरीत्या उभे करून त्यातील सुदृढ बैल जोडी निवडीसाठी समिती नेमण्यात आली होती. या समितीत वैजनाथ भालेराव, सदाशिव मोरे, गंगाधर राजेवाड, रामचंद्र शेटे, देविदास चंद्रे यांचा समावेश होता.
बैलपोळा निमित्त काँग्रेसच्या वतीने पाच आकर्षक बक्षिसांसह प्रोत्सांहपर बक्षीस ठेवण्यात आले होते. यामध्ये प्रथम पारितोषिक सात हजार एकशे आकरा, द्वितीय पारितोषिक पाच हजार एकशे आकरा रुपये, तृतीय पारितोषिक 3111रुपये, चतुर्थ पारितोषिक 2111 रुपये, पाचवे पारितोषिक पंधराशे आकरा व प्रोत्साहन पर अकराशे आकरा रुपये ठेवण्यात आले होते. पारितोषिक निवडीच्या निकषात सुदृढ बैल, रंगरंगोटी सजावट यास प्राधान्य देण्यात आले होते. यामध्ये शहरातील जवळपास 200 च्या वर बैलजोडींनी सहभाग घेतला होता.
सुदृढ बैलजोडी च्या प्रथम पारितोषिकेचा मान गजानन चौधरी यांच्या बैलजोडीस मिळाला आहे. द्वितीय पारितोषिक वैजनाथ पचलिंग, तृतीय पारितोषिक बाळू चंद्रे, चतुर्थ पारितोषिक भुजंग फुले, पाचवे पारितोषिक माधव आऊलवार यांच्या बैलजोडीस मिळाले आहे. प्रोत्साहन पर पारितोषिक भाजपचे समन्वयक संजय आऊलवार यांच्या बैलजोडीस मिळाले. काँग्रेसच्या वतीने तालुकाध्यक्ष प्रताप देशमुख बारडकर, शहराध्यक्ष कैलास गोडसे, युवा काँग्रेसचे गजानन संबोड, गिरीश कोतावार, राधेश्याम ढगे, महाराजा डेअरी, शिवानंद देवके यांच्या वतीने बक्षीस ठेवण्यात आली होती.
सुदृढ बैलजोडींना काँग्रेसचे केशवराव कदम, करीम खान साहब, शंकर राठी, खलील कुरेशी, महावीर कंधारकर,सुधाकर आडकीने, प्रताप देशमुख कैलास गोडसे, अतिक अहमद, शिवसेना शहर प्रमुख सचिन चंद्रे यांच्या हस्ते बक्षीस वितरण करण्यात आले. यासोबतच शेतकऱ्यांचा गौरव करण्यात आला. या उपक्रमाने शेतकऱ्यात नवचैतन्याचे वातावरण पसरले आहे. काँग्रेसच्या वतीने सर्वधर्मसमभावाचा संदेशही देण्यात आला.या उपक्रमासाठी गिरीश कोत्तावार, राधेश्याम ढगे, गजानन संबोड
,सुरेश ढगे,माणीक पचंलीग, शिवानंद देवके, शिवा तरोडकर, मोईन खान, महेश गोदनगावे ,वेदांत शेवटे यांच्यासह आदींनी पुढाकार घेतला होता. यावेळी , रमेश बोडके, संदेश वाघमारे, राजण वडे, शिरीष श्रीरामवार, लतीफ टेलर, माध्यम समूहाचे अध्यक्ष सिद्धार्थ चौदांते, अब्दुल रझाक, ईश्वर पिनलवार, शेख जब्बार,यांच्यासहशेतकरी मोठ्या संख्येने उपस्थित होते.
