तभा फ्लॅश न्यूज/मुंबई : सत्ताधारी मंत्री, आमदाराचे वर्तनामुळे राज्याची मान शरमेने खाली गेली आहे. मात्र त्यांना जरासुद्धा लाज वाटत नाही,असे सांगून ठाकरे गटाचे नेते खा. संजय राऊत म्हणाले,’ अमित शाह यांनी देवेंद्र फडणवीस यांना 4 मंत्र्याना डच्चू देण्यास सांगितले आहे. त्यामध्ये कोकाटे यांचाही समावेश असल्याची माझी माहिती आहे, असा दावा केला आहे. त्यांच्यासह काँग्रेसचे नाना पटोले, विधान परिषदेतील विरोधी पक्षनेते अंबादास दानवे,विजय वडेट्टीवार, जितेंद्र आव्हाड, माजी राज्यमंत्री बच्चू कडू,आदींनी त्यांच्यावर टीका करत मुख्यमंत्री फडणवीस व उपमुख्यमंत्री अजित पवार यांनी तातडीने राजीनामा घेण्याची मागणी केली आहे.
दरम्यान, कोकाटे यांच्या या कृत्याबद्दल सत्ताधारी भाजपाचे जेष्ठ आमदार सुधीर मुनगटीवार यांनी नाराजी व्यक्त केली आहे, तर परिवहन मंत्री प्रताप सरनाईक यांनी त्यांचे समर्थन केले आहे.अमीर खान, शाहरुख खान जर ते खेळत असतील तर त्यात वावगे काय आहे?, असा उलट सवाल त्यांनी उपस्थित केला.
तर कोकाटे हे जबाबदार मंत्री आहेत. त्यांनी व्हायरल व्हिडीओवर स्वतः खुलासा केला आहे. त्यांना काही सूचना द्यायच्या असतील तर त्या देईल, अशी प्रतिक्रिया राष्ट्रवादी काँग्रेस (अजित पवार) पक्षाचे प्रदेशाध्यक्ष खा. सुनील तटकरे यांनी दिली आहे.
