तभा फ्लॅश न्यूज/ मुंबई : राष्ट्रवादी काँग्रेस (शरद पवार गट) पक्षाचे आमदार रोहित पवार यांच्यावर पोलिसांशी गैरवर्तन आणि सरकारी कामात अडथळा निर्माण केल्याप्रकरणी मुंबईतील आझाद मैदान पोलीस ठाण्यात गुन्हा दाखल करण्यात आला आहे.
हा प्रकार विधानभवनात दोन दिवसांपूर्वी घडलेल्या हाणामारीच्या घटनेशी संबंधित असून, आमदार जितेंद्र आव्हाड आणि भाजपचे आमदार गोपीचंद पडळकर यांच्यातील वादानंतर आव्हाड यांचे समर्थक व आमदार नितीन देशमुख यांना पोलिसांनी ताब्यात घेतले होते.
या अटकेविरोधात रोहित पवार थेट आझाद मैदान पोलीस ठाण्यात गेले होते. मात्र, तपासासाठी नेलेला कार्यकर्ता तिथे नसल्याचे सांगताच पोलीस आणि रोहित पवार यांच्यात वाद झाला. यावेळी रोहित पवार यांनी अधिकाऱ्यांशी अरेरावी केल्याचा आरोप पोलिसांनी केला असून, त्यावरून गुन्हा नोंदवण्यात आला आहे.
नेमकं काय घडलं?
विधानसभेच्या लॉबीत झालेल्या गोंधळात आमदार जितेंद्र आव्हाड यांच्या समर्थकांवर कारवाई करण्यात आली. त्यानंतर रोहित पवार आणि आव्हाड पोलीस ठाण्यात गेले असताना, अटक केलेला कार्यकर्ता तिथे नसल्याचे पोलिसांनी सांगितले. यावरून रोहित पवार यांनी संतप्त प्रतिक्रिया दिली आणि पोलीस अधिकाऱ्यांशी वाद घातला.
