वैराग – जुन्या गुन्ह्यामध्ये माझे नाव का घेतले म्हणून भर दिवसा वैराग मधील एका दुकानात जाऊन कोयत्यांनी दहशत माजवत जीवे ठार मारण्याची धमकी दिल्या प्रकरणी वैराग पोलीस ठाण्यात एकाच्या विरोधात गुन्हा दाखल करण्यात आला आहे. विशेष म्हणजे या गुन्ह्यात कोयता वापरून दहशत माजवल्याने भविष्यातील धोके ओळखून वैराग पोलिसांनी आरोपीची मुख्य रस्त्यावरून धिंड काढून सर्वसामान्यांना दिलासा दिला आहे.
याबाबत वैराग पोलिसांकडून मिळालेली अधिक माहिती अशी की, वैराग शहरातील पंचशील नगर येथे फिर्यादी सुरज भोसले यांचे भोसले ट्रेडर्स किराणा मालाचे दुकान आहे.या दुकानांमध्ये एक वर्षांपूर्वी तुळशीदास नगर येथील संतनाथ सहकारी साखर कारखान्यावरून तेथील विद्यमान सरपंचांचे दीर अजित पाटील यांना मारहाण झाली होती. या प्रकरणी आयाज शेख, युवराज प्रबळकर,विजय उबाळे व प्रतीक भोसले यांच्या विरोधात गुन्हा दाखल करण्यात आला होता. याप्रकरणी माझे नाव का घेतले? असे म्हणत ,आयाज शेख याने कोयता घेऊन भोसले ट्रेडर्स मध्ये गुरूवारी सायंकाळी ६ वाजता दुकानात जात दहशत माजवण्याचा प्रयत्न केला.
यावेळी त्याने काउंटरवर असलेले कॅडबरी फ्रिज फोडून जीवे ठार मारण्याची धमकी दिली. आणि काही वेळातच तो पळून गेला. दरम्यान कोयत्याने दहशत माजवल्यामुळे वैराग शहरात एकच खळबळ उडाली.त्यानंतर वैराग पोलीस ठाण्यातील पोलीस कॉन्स्टेबल शरद कांबळे आणि श्रीमंत शिंगाडे या दोघांनी वेगाने सूत्रे हलवून अवघ्या एका तासात आत आरोपीला त्याच्या हत्यारासह ताब्यात घेतले आणि आरोपीला बेड्या ठोकल्या. शुक्रवारी सकाळी आरोपीची मुख्य रस्त्यावरून धिंड काढत भोसले ट्रेडर्स मध्ये नेऊन पंचनामा करण्यात आला.
दरम्यान वैराग मध्ये वाढत्या दहशती कृत्यांविरोधात पोलीस आक्रमक झाल्याचे दिसून येत आहे.ही धिंड पोलीस निरीक्षक कुंदन गावडे यांच्या मार्गदर्शनाखाली उपनिरीक्षक प्रतापसिंह जाधव,पोलीस हेडकॉन्स्टेबल फुलचंद जाधवर, उमेश कंगले,आकाश पवार, सागर उमाटे,शिवलिंग कांबळे, राहुल पाटील यांनी काढली.
दुकानात गिऱ्हाईक चालू असताना ग्राहकाला देखील शिव्या दिल्या, ३०७ च्या जुन्या गुन्ह्यात नाव का घेतले म्हणत जीवे ठार मारण्याची धमकी देत कोयत्याने कॅडबरीचा फ्रिज फोडत दहशत माजवली असे सुरज भोसले यांनी सांगितले.
यापूर्वी संबंधित आरोपीवर ३०७ चा गंभीर गुन्हा दाखल असून वैराग पोलीस ठाण्याच्या हद्दीत अशाप्रकारे दहशत माजवण्याचा कुणीही प्रयत्न केला तर तो खपवून घेतले जाणार नाही. असा इशारा वैराग पोलीस ठाण्याचे पोलीस निरीक्षक कुंदन गावडे यांनी दिला आहे.
