सोलापूर – महाराष्ट्र स्टेट ब्रांच इंडियन रेडिओलॉजी अँड इमेजिंग असोसिएशन (MSBIRIA) या राज्यातील रेडिओलॉजिस्टांची प्रमुख आणि प्रतिष्ठित संस्थेच्या निवडणुकीत सोलापूरचे ज्येष्ठ रेडिओलॉजिस्ट डॉ. वैभव मेरू यांनी प्रभावी विजय मिळवत प्रदेशाध्यक्षपदी निवड झाली आहे. राज्यभरातील रेडिओलॉजिस्टांकडून मिळालेल्या उत्स्फूर्त प्रतिसादामुळे डॉ. मेरू यांनी प्रतिस्पर्धी डॉ. स्नेहल वैद्य यांचा तब्बल 697 मतांनी पराभव करत 1785 मते मिळवली. सोलापूरच्या वैद्यकीय क्षेत्रासाठी ही निवड मोठा सन्मान मानली जात आहे.
गेली वीस वर्षे डॉ. मेरू हे सोलापूरातील PRISM मेडिकल डायग्नॉस्टिक्समार्फत रेडिओलॉजी सेवेत उल्लेखनीय कार्यरत आहेत. NABH मानांकन प्राप्त असलेल्या त्यांच्या केंद्रामुळे सोलापूर जिल्ह्यात अत्याधुनिक निदान सुविधांची उपलब्धता वाढली आहे. संस्था कार्यात ते सोलापूर चॅप्टरचे संस्थापक अध्यक्ष व सचिव, तसेच जॉइंट सेक्रेटरी, ECM, CCM आणि उपाध्यक्ष या महत्त्वाच्या भूमिकांमध्ये काम केले आहे. त्यांनी मुंबई ते चंद्रपूरपर्यंत संपूर्ण महाराष्ट्रात फिरत अधिवेशन, प्रशिक्षण कार्यक्रम, विविध CME आणि आउटरीच उपक्रम यांची शेकडो कार्यक्रमांची मालिका राबवली आहे.
सोलापूरमध्ये 2017 मध्ये झालेली राज्यस्तरीय वार्षिक परिषद त्यांच्या नेतृत्वाखाली अत्यंत यशस्वी ठरली. महाराष्ट्र कॉलेज ऑफ रेडिओलॉजी तसेच MSBIRIA या दोन्ही संस्थांमध्ये त्यांचे योगदान उच्चस्तरीय मानले जाते. रेडिओलॉजी शिक्षण, प्रशिक्षण आणि ग्रामीण भागातील MRI–CT निदान सेवा पोहोचवण्यात त्यांचा महत्त्वाचा वाटा आहे.
निवडणूक प्रचारादरम्यान डॉ. मेरू यांनी तंत्रज्ञानाधिष्ठित प्रगती, डिजिटल MSBIRIA, AI साक्षरता, PCPNDT संरक्षण, तरुण डॉक्टरांसाठी स्टार्टअप किट्स, पारदर्शक कार्यप्रणाली आणि अधिक चॅप्टर्सच्या स्थापनेचा दूरदर्शी आराखडा मांडला. “MSBIRIAला नावीन्य, एकजूट आणि प्रगतीच्या दिशेने नेणे हे माझे ध्येय आहे. राज्यभरातील रेडिओलॉजिस्टांचा विश्वास हीच माझी ताकद आहे,” असा संदेश त्यांनी विजयानंतर दिला.
डॉ. मेरू यांच्या विजयामुळे सोलापूरच्या वैद्यकीय क्षेत्रात आनंदाचे वातावरण असून, असोसिएशनचे राष्ट्रीय अध्यक्ष डॉ. संदीप कवठाळे, तसेच डॉ. योगेंद्र माशाळीकर, डॉ. अनिरुद्ध कुलकर्णी, डॉ. संदीप पानसारे, डॉ प्रशांत पाटील आदी मान्यवरांनी त्यांचे मन:पूर्वक अभिनंदन करून पुढील वाटचालीस शुभेच्छा दिल्या.
