सोलापूर : महानगरपालिका महिला व बालकल्याण विभागामार्फत झाशीची राणी लक्ष्मीबाई व माजी पंतप्रधान स्व.इंदिरा गांधी यांच्या जयंतीचे औचित्य साधून मनपाच्या 25 शाळांमध्ये ‘सुंदर हस्ताक्षर कार्यशाळा’ घेण्यात आली.
मनपा आयुक्त डॉ. सचिन ओम्बासे यांच्या मार्गदर्शनाखाली आणि अतिरिक्त आयुक्त वीणा पवार यांच्या सूचनेनुसार या प्रशिक्षण कार्यशाळेचे आयोजन मनपाच्या प्राथमिक 22 व माध्यमिक 3
शाळांमध्ये करण्यात आले होते. यामध्ये 550 विद्यार्थ्यांनी सहभाग घेतला. कार्यशाळेचे उद्घाटन अतिरिक्त आयुक्त वीणा पवार यांच्या हस्ते भारताच्या प्रथम शिक्षिका सावित्रीबाई फुले यांच्या प्रतिमेसमोर दीपप्रज्वलनाने करण्यात आले. यावेळी महिला व बालकल्याण अधिकारी अजित कुमार खानसोळे, हस्ताक्षर तज्ज्ञ अभिजीत भडंगे ,मनपा प्रशासकीय कार्यालयीन प्रमुख अल्लाबक्ष शेख, मनपा शाळा क्र. १ चे मुख्याध्यापक जगन्नाथ सज्जन यांची प्रमुख उपस्थिती होती.
यावेळी अतिरिक्त आयुक्त वीणा पवार यांनी मार्गदर्शन करताना हस्ताक्षराचे महत्त्व विद्यार्थांना सांगितले. हस्ताक्षर तज्ज्ञ अभिजीत भडंगे यांनी या कार्यशाळेत विद्यार्थ्यांना सुंदर व वळणदार अक्षर काढण्याबाबत सोप्या पद्धतीने शिकवले. यावेळी लिपिक श्रीनिवास पेद्दिंटी, नितीन मुंढे, प्रथमेश सदाफुले, ऋषी लोखंडे, शिक्षिका हंचाटे आदी उपस्थित होते.
प्रारंभी महिला व बालकल्याण अधिकारी अजित कुमार खानसोळे यांनी स्वागत केले. सूत्रसंचलन शिक्षिका खरबस यांनी तर आभार शिक्षक गोपू कांबळे यांनी मानले.
वीणा पवार यांच्याकडून 500 वह्या भेट
या कार्यक्रमात अतिरिक्त आयुक्त वीणा पवार यांनी सांगितले की, समारंभात पुष्पगुच्छ, फुले किंवा शाल न देता त्याऐवजी गरीब, गरजू विद्यार्थ्यांना वह्या, पुस्तके, पेन अशा शैक्षणिक वस्तू भेट द्याव्यात, जेणेकरून त्याचा सदुपयोग होऊन एक आदर्श निर्माण होईल. या कल्पनेची सुरुवात वीणा पवार यांनी स्वतः कृतीतून केली. त्यांनी स्वतः ५०० वह्या विद्यार्थ्यांना भेट म्हणून दिल्या. सुंदर हस्ताक्षर उपक्रम सोबतच महानगरपालिका विद्यार्थ्यांच्या शालेय जीवनात सकारात्मक बदल घडवण्यासाठी असे विविध अभिनव उपक्रम यापुढेही राबवत राहील, अशी ग्वाही त्यांनी दिली.
