सोलापूर : विश्वभूषण डॉ. बाबासाहेब आंबेडकर यांच्या पदस्पर्शाने सोलापूर नगरी क्रांती प्रवण झाली आहे. आंबेडकरी विचारांचा समृद्ध आणि जाज्वल्य वारसा सोलापूर शहर – जिल्ह्याला लाभला आहे. चैतन्याचे प्रणेते डॉ. बाबासाहेब आंबेडकर या ग्रंथात लेखक दत्ता गायकवाड यांनी डॉ. आंबेडकर यांचा सोलापूरची ऋणानुबंध, त्यांचा त्याग आणि त्यांच्या समवेतचा माता रमाई यांचा प्रवास अभ्यास पूर्णपणे मांडला आहे, असे प्रतिपादन विधानसभेचे उपाध्यक्ष अण्णासाहेब बनसोडे यांनी येथे केले.
चैतन्याचे प्रणेते डॉ. बाबासाहेब आंबेडकर या ग्रंथाचे लेखक, जेष्ठ अभ्यासक दत्ता गायकवाड यांचा सन्मान सोहळा विधानसभेचे उपाध्यक्ष अण्णासाहेब बनसोडे यांच्या हस्ते फॉरेस्ट येथे थाटात पार पडला. यावेळी विचारमंचावर प्रा. एम. आर. कांबळे , महापालिका पत्रकार संघाचे अध्यक्ष किरण बनसोडे, समारंभाचे संयोजक तथा राष्ट्रवादी काँग्रेस अजित पवार गटाचे प्रदेश उपाध्यक्ष आनंद चंदनशिवे, किसन जाधव, शहराध्यक्ष संतोष पवार, कार्याध्यक्ष जुबेर बागवान आदींसह मान्यवरांची प्रमुख उपस्थिती होती.
यावेळी सन्मानचिन्ह शाल , निळी टोपी, उपरणे आणि पुष्पगुच्छ देऊन लेखक गायकवाड यांचा यथोचित गौरव करण्यात आला. प्रारंभी विश्वभूषण डॉ. बाबासाहेब आंबेडकर आणि महात्मा ज्योतिराव फुले यांच्या प्रतिमेचे पूजन मान्यवरांच्या हस्ते करण्यात आले. सूत्रसंचालन व आभार प्रदर्शन प्रा. डॉ. अंजना गायकवाड यांनी केले.
अण्णासाहेब बनसोडे पुढे म्हणाले, लेखक दत्ता गायकवाड यांनी आपल्या ग्रंथामध्ये डॉ. आंबेडकर यांचा ऋणानुबंध संशोधन आणि अभ्यास पूर्णपणे मांडला आहे. डॉ. आंबेडकरांचे कार्य त्याचबरोबर त्यांच्यासमवेत सोलापुरातील माता रमाई यांचा प्रवास अंतर्भूत केला आहे. तो एक ऐतिहासिक दस्तावेज ठरणार आहे. 85 वर्षीय या लेखकाची वाचन आणि लेखनाची भूक मोठी आहे. याचा अभिमान वाटतो.
याप्रसंगी माजी नगरसेवक गणेश पुजारी, डि.के बहुउद्देशीय सामाजिक संस्थेचे संस्थापक दशरथ कसबे, दिनेश शिंदे, दिपाली लोंढे, सूर्यमणि गायकवाड, सुधीर चंदनशिवे, पुरुषोत्तम कसबेकर, अरविंद शेंमाडे,
श्रीमंत जाधव, चाचा सोनवणे, वैभव गंगणे, प्रेमानंद लोंढे, राज कांबळे, निवृत्त पोलीस उपायुक्त बाळासाहेब सरवदे, प्रणव लोंढे, चंद्रमणी कांबळे, राजू काटे, दीक्षांत सरवदे, करुणा शेमाडे यांच्यासह पदाधिकारी , परिसरातील महिला व कार्यकर्ते मोठ्या संख्येने उपस्थित होते.
आंबेडकरी चळवळीतील सोलापुरातील पहिला आमदार फॉरेस्ट येथीलच : चंदनशिवे
प्रस्ताविक भाषणात आनंद चंदनशिवे म्हणाले, भारतरत्न डॉ. बाबासाहेब आंबेडकर यांचा आणि चळवळीचा संपूर्ण इतिहास साहित्यिक दत्ता गायकवाड यांनी ग्रंथरूपात सर्वांना सादर केला आहे. त्यांचे योगदान महत्त्वपूर्ण आहे. फॉरेस्ट येथील गंगा निवास येथे डॉ. आंबेडकर यांनी वास्तव्य केले होते. इथूनच स्वतंत्र मजूर पक्षाचे जिवाप्पा ऐदाळे हे सोलापुरातून पहिले आमदार म्हणून निवडून आले होते. आंबेडकरी चळवळीत योगदान देणाऱ्याचा सन्मान हा सर्वांसाठी प्रेरणादायी आहे. तो सोहळा फॉरेस्ट येथेच होत असल्याचा अभिमान वाटतो, असे आनंद चंदनशिवे म्हणाले.
पुण्यातील डॉ. आंबेडकरांचे ऋणानुबंध यावर गायकवाड यांनी ग्रंथ लिहावा : बनसोडे
भारतरत्न डॉ. बाबासाहेब आंबेडकर हे अनेक वेळा पुण्याला आले होते. इथे त्यांचे वास्तव्य होते. पुण्यातील ऋणानुबंधासंदर्भात आम्ही माहिती देऊ, त्या आधारे लेखक दत्ता गायकवाड यांनी त्यावर ग्रंथ लिहावा. यामुळे महाराष्ट्रातील जनतेला आनंद होईल, अशी अपेक्षा विधानसभेचे उपाध्यक्ष अण्णासाहेब बनसोडे यांनी व्यक्त केली.
