देशातील पहिली एसी डबल डेकर बस मुंबईच्या रस्त्यांवर आता धावणार आहे. ही बस पुण्यातील ऑटोमोटिव रिसर्च असोसिएशन ऑफ इंडियाकडून (ARAI) फिटनेस सर्टिफिकेट मिळालं आहे. स्विच नावाच्या कंपनीकडून ही बस तयार करण्यात आली आहे. २०२२ मध्ये ऑगस्ट महिन्यातच ही बस आली होती. मात्र बस प्रवाशांच्या सेवेत दाखल करण्याआधी याला ARAI कडून मंजूरी मिळणं गरजेचं होतं. ही बस रविवारी संध्याकाळी मुंबईत पोहोचली. ही बस आठवड्याभरात सुरू होईल. हैदराबाद येथील स्विच कंपनीने दिलेल्या माहितीनुसार, बस २०२२ मध्ये तयार असली, तरी तिला ARAI कडून मंजूरी मिळाली नव्हती. आता याला मंजूरी देण्यात आली आहे. आता पहिल्या टप्प्यात लवकरच दहा बसेस मुंबईत पाठवल्या जातील.
बसची ऑपरेशनल क्षमता १८० किमी पर्यंत असणे अपेक्षित आहे. रस्त्यांची गुणवत्ता, ट्रॅफिक आणि हवामान यासारखे अनेक घटक यासाठी विचारात घेतले जातात. ४५ मिनिटांच्या चार्जिंगमध्ये बस १०० किमीपर्यंत धावू शकते, तर संपूर्ण चार्जसाठी ८० मिनिटं लागतात. या बसची बॉड अॅल्युमिनिअमपासून बनलेली आहे. या एका बसची किंमत जवळपास २ कोटी रुपये आहे. यातून जवळपास ८० प्रवासी प्रवास करू शकतात.
अशोक लेयलँडच्या स्विच कंपनीला बेस्टकडून २०० एसी डबल डेकर बस तयार करण्याची ऑर्डर मिळाली आहे. कंपनी ही ऑर्डर एक ते दीड वर्षात पूर्ण करेल. सध्या बेस्टच्या ताफ्तात डिझेलवर चालणाऱ्या ४५ जुन्या डबल डेकर बसेस आहेत, ज्या जून २०२३ पर्यंत सर्विसबाहेर होतील. या सर्व ४५ बसेस काढून त्याजागी जून २०२३ पर्यंत नव्या इलेक्ट्रिक डबल डेकर बसेस चालवल्या जातील.
बेस्टच्या ताफ्यात २०० एसी डबल डेकर बसेस आल्यानंतर जवळपास ४१ टक्के कार्बन फुटप्रिंट कमी करण्यासाठी आणि वर्षाला २६ मिलियन लीटर डिझेल वाचवण्यास मदत होईल. बेस्टला पहिली एसी डबल डेकर बस सर्व आवश्यक मंजुरींसह मिळाली असून येत्या ८ दिवसांत आणखी ४ डबल डेकर बसेस ताफ्यात येणार आहेत. या बसेस आठवड्याभरात प्रवाशांच्या सेवेत सामिल केल्या जातील.
बेस्टकडे सध्या ३६०० बसेस आहेत. त्या या वर्षाच्या अखेरीस ७ हजारपर्यंत करण्याचं टार्गेट आहे. सध्या बेस्टच्या १३६ महिलांसाठी बसेस आहेत, त्याची संख्या वाढवून त्या ५०० पर्यंत केल्या जातील. २०२६ पर्यंत बेस्टच्या ताफ्यात सर्व इलेक्ट्रिक बसेस असतील अशी माहिती आहे. या इलेक्ट्रिक बसेसमुळे शहरातील प्रदूषण कमी करण्यास मदत होईल.
ही बेस्ट सेवा वांद्रे-कुर्ला संकुल ते वांद्रे स्थानक या मार्गांवर धावणार आहे. कुर्ला ते सांताक्रुझ या मार्गावर सुरुवातीला ही बस धावेल. या एसी बसचं कमीत कमी भाडं ५ किलोमीटरपर्यंत ६ रुपये असणार आहे. या बसमध्ये सीसीटीव्ही कॅमेरे, चालक-वाहक यांच्यातील संपर्कासाठी विशेष व्यवस्था, बसच्या दोन्ही बाजूला स्वयंचलित दरवाजे असतील.
