बिग बॉस १६ ची ट्रॉफी रॅपर एमसी स्टॅनने पटकावली. एमसी स्टॅनने झोपडपट्टीतील भागातून वर येऊन जगभरात नाव तर कमावलंच, आता बिग बॉस १६ चा तो विजेताही ठरला. एमसी स्टॅनसला त्याच्या तगड्या फॅन फॉलोइंगमुळे इतकं मोठं यश मिळालं. एका झोपडपट्टीत राहणारा, रस्त्यावर रात्र काढणारा अल्ताफ तडवी एक दिवस MC Stan बनून रॅपर बनेल, सर्वात पॉप्युलर रिअॅलिटी शो बिग बॉस १६ चा तो विजेता ठरेल असा कोणी कधी विचारही केला नसेल. एमसी स्टॅनचा इथपर्यंत पोहचण्याचा प्रवास सोपा नव्हता.
एमसी स्टॅन पुण्यात राहणारा आहे. त्याचे वडील पोलिसांत कार्यरत होते, पण दोन वेळचं नीट जेवायला मिळेल अशीही त्यांची परिस्थिती नव्हती. अनेकदा त्याच्याकडे पैसे नसायचे. अशावेळी त्याला रिकाम्या पोटी झोपावं लागलं आणि अनेकदा रस्त्यावर रात्र काढवी लागली. पण एमसी स्टॅन गरिबी असतानाही त्याची हिंमत हरला नाही. एमसी स्टॅनने मोठं होऊन शिक्षण घेऊन यशस्वी व्हावं अशी त्याच्या आई-वडिलांची इच्छा होती, पण स्टॅनला लहानपणापासून गाणं लिहिण्याची आवड होती. तो अभ्यास सोडून गाणी बनवायचा. त्याच्या आई-वडिलांना त्याचं गाणं लिहिणं, रॅप करणं पसंत नव्हतं. पण स्टॅनने त्याला रॅपच्या जगातच करिअर करायचं असल्याचं ठरवलं होतं.
वयाच्या १२व्या वर्षी एमसी स्टॅनने कव्वाली गाण्यावर परफॉर्म केलं होतं. पण त्याला रॅप करायला लागल्यानंतर खरी ओळख मिळाली. त्याच्या भावाने त्याला रॅपची ओळख करुन दिली होती. स्टॅनने अस्तगफिरुल्लाह नावाने त्याचं पहिलं रॅप साँग रिलीज केलं होतं आणि ते हिट ठरलं होतं. या गाण्यात स्टॅनने त्याच्या स्ट्रगलची कहाणी सांगितली होती. याच गाण्याने स्टॅनला स्टार बनवलं. त्यावेळी त्याच्या या गाण्याला यूट्यूबवर २१ मिलियन व्ह्यूज मिळाले होते.
कधी रिक्षामध्ये, कधी रस्त्यावर झोपणाऱ्या स्टॅनकडे आता अनेक लग्झरी कार्स आहेत. स्टॅनला हिंदी भाषेवर प्रेम असून त्याने त्याच्या लेबलचं नाव हिंदी रेकॉर्ड्स असं सुरू केलं. एमसी स्टॅनचं आयुष्य अतिशय वादग्रस्तही ठरलं. त्याच्या रॅपवर, गाण्यांवर अनेकदा अपशब्द, वाईट कमेंट्स आल्या आहेत. यामुळेच स्टॅन अनेकदा वादात आला आहे. स्टॅनने बिग बॉस १६ मध्ये येण्याआधी त्याला या शोमध्ये का यायचं याबाबत सांगितलं होतं. लोकांची आपल्याप्रती असलेली प्रतिमा, लोकांचा त्याच्यासाठी असलेला दृष्टीकोन बदलावा, तसंच स्वत:च्या रागावर नियंत्रण मिळवावं यासाठी त्याने बिग बॉस १६ मध्ये जाण्याचा निर्णय घेतला असल्याचं म्हटलं होतं. एमसी स्टॅनचा झोपडपट्टीत राहण्याचा ते आता बिग बॉस ट्रॉफी जिंकण्यापर्यंतचा प्रवास लाखो लोकांसाठी प्रेरणादायी ठरला आहे.
