सोलापूर : महानगरपालिकेत उद्या होणाऱ्या नूतन महापौर व उपमहापौर पदाच्या निवड प्रक्रियेच्या पार्श्वभूमीवर आज महापालिका आयुक्त डॉ. सचिन ओम्बासे यांनी संबंधित कार्यालये व सभागृहांची पाहणी केली.
यावेळी आयुक्त डॉ. सचिन ओम्बासे यांनी महापौर कार्यालय, उपमहापौर कार्यालय, सभागृह नेते कार्यालय तसेच कै. यशवंतराव चव्हाण सभागृह येथे प्रत्यक्ष भेट देऊन पाहणी केली. उद्या होणाऱ्या निवड प्रक्रियेची तयारी, व्यवस्था, बैठक नियोजन, सभागृहातील आसन व्यवस्था, सुरक्षा व इतर अनुषंगिक बाबींचा आढावा घेण्यात आला.
महापौर व उपमहापौर निवड प्रक्रिया कोणत्या पद्धतीने पार पडणार आहे, कायदेशीर तरतुदी, नियमावली तसेच निवड प्रक्रियेदरम्यान घ्यावयाच्या दक्षता याबाबतची सविस्तर माहिती नगर सचिव प्रवीण दंतकाळे यांच्याकडून आयुक्तांनी घेतली. निवड प्रक्रिया सुरळीत, पारदर्शक व नियमानुसार पार पडावी, यासाठी आवश्यक त्या सर्व उपाययोजना करण्याच्या सूचना आयुक्तांनी संबंधित अधिकाऱ्यांना दिल्या.
महापालिकेच्या लोकशाही प्रक्रियेतील महत्त्वाचा टप्पा असलेल्या या निवड प्रक्रियेसाठी सर्व विभागांनी समन्वयाने काम करून आवश्यक त्या सुविधा व व्यवस्था उपलब्ध करून द्याव्यात, असेही आयुक्तांनी यावेळी निर्देशित केले.
यावेळी उपायुक्त आशिष लोकरे, नगर अभियंता सारिका आकूलवार, अंतर्गत लेखा परीक्षक राहुल कुलकर्णी, उपअभियंता प्रकाश दिवानजी, कर संकलन विभाग अधीक्षक युवराज गाडेकर, विद्युत विभाग अभियंता महादेव इंगळे, सामान्य प्रशासन विभाग अधीक्षक रजाक पेंढारी, नितीन गायकवाड , मुख्य सफाई अधीक्षक नागनाथ बिराजदार आदी अधिकारी व कर्मचारी उपस्थित होते.
हायटेक साऊंड सिस्टीम व्यवस्था ; एआय
माध्यमातून प्रोसिडिंग करण्याची तयारी
महापालिकेच्या सभागृहात एकूण 55 बेंचवर सदस्यांना बसण्याची व्यवस्था करण्यात आली आहे. प्रत्येक बेंचवर एक ते 55 असे नंबर चिटकवण्यात आले आहेत. हायटेक अशी साऊंड सिस्टिम करण्यात आली आहे.
महापौर यांच्या डायस समोरही नवे पाच माईक लावण्यात आले आहेत. हायटेक मिक्सर लावण्यात आला आहे. या मिक्सरला ब्लूटूथ अटॅच आहे. त्याचबरोबर ऑटोमॅटिक रेकॉर्डिंगची ही व्यवस्था आहे. त्या आधारे एआय सिस्टीमच्या माध्यमातून भविष्यात व्हॉइस रेकॉर्डिंग वरून प्रोसिडिंग टाईप करण्याची व्यवस्था करण्यात येणार आहे.
या सर्व सिस्टिमची यशस्वी चाचणीही आज करण्यात आली. वायफायची ही व्यवस्था ठेवण्यात आली आहे.
