सोलापूर : आजच्या झपाट्याने बदलणाऱ्या तंत्रज्ञानविश्वात स्थिर राहणे म्हणजे मागे पडणे, तर बदलांना वेगाने स्वीकारणे म्हणजे यशाकडे वाटचाल असे मौलिक मार्गदर्शन उद्योगपती राजेश दमाणी यांनी दिले.
एस.ए.पी.डी. जैन पाठशाळा संचलित हिराचंद नेमचंद कॉलेज ऑफ कॉमर्सच्या व्यवस्थापन विभागांतर्गत बी.सी.ए. तर्फे आयोजित ‘अजाईल मेथडॉलॉजी’ या एकदिवसीय राष्ट्रीय चर्चासत्राच्या उद्घाटनप्रसंगी दमाणी बोलत होते.
१४ फेब्रुवारी २०२६ रोजी पार पडलेल्या या चर्चासत्रात उद्योगजगत आणि शिक्षणक्षेत्र यांचा सुसंवाद साधत विद्यार्थ्यांना आधुनिक कार्यसंस्कृतीची दिशा देण्यात आली. उद्घाटन मान्यवरांच्या हस्ते दीपप्रज्वलनाने झाले. प्रमुख पाहुणे म्हणून बोलताना दमाणी यांनी स्पष्ट केले की, अजाईल पद्धती ही केवळ व्यवस्थापन तंत्र नाही, तर ती बदलांचा स्वीकार करून कार्यक्षमतेत सातत्याने वाढ साधणारी विचारसरणी आहे. “ग्राहकांच्या अपेक्षा क्षणाक्षणाला बदलत आहेत. त्यानुसार उद्योग-सेवा क्षेत्राने लवचिक, वेगवान आणि परिणामकेंद्रित दृष्टिकोन स्वीकारला पाहिजे,” असे ते म्हणाले. विद्यार्थ्यांनी कौशल्याधारित शिक्षणावर भर देत उद्योगमान्य तत्त्वांचा अंगीकार करावा, असेही त्यांनी सुचविले.
प्राचार्य डॉ. सत्यजित शहा यांनी स्वागतपर भाषणात महाविद्यालयातील शैक्षणिक व कौशल्यविकास उपक्रमांची माहिती दिली. व्यवस्थापन विभाग प्रमुख डॉ. प्रीतम कोठारी यांनी चर्चासत्र आयोजित करण्यामागील हेतू स्पष्ट करताना विद्यार्थ्यांना जागतिक स्तरावरील कार्यपद्धतींची ओळख करून देणे हा मुख्य उद्देश असल्याचे सांगितले. बी.सी.ए. कोर्स प्रमुख प्रा. अनिता सद्दलगी यांनी मान्यवरांची ओळख करून दिली.
चर्चासत्रात प्रमुख वक्ते म्हणून गजानन चौधरी (प्रोजेक्ट हेड, चीफ स्क्रम मास्टर, Coforge Ltd., पुणे) आणि सचिन अनुसे (रियालिटी सॉफ्टवेअर सोल्युशन्स, हैदराबाद) यांनी मार्गदर्शन केले. चौधरी यांनी ‘स्क्रम’ आणि ‘अजाईल’ या केवळ कार्यपद्धती नसून ती टीमवर्क, पारदर्शकता आणि सातत्यपूर्ण सुधारणा यांवर आधारलेली कार्यसंस्कृती असल्याचे अधोरेखित केले. योग्य नियोजन आणि सामूहिक जबाबदारीच्या माध्यमातून कोणताही प्रकल्प यशस्वीपणे पूर्ण करता येतो, असे त्यांनी सांगितले.
सचिन अनुसे यांनी आयटी क्षेत्रात अजाईल पद्धतीची वाढती गरज स्पष्ट करताना विद्यार्थ्यांनी सैद्धांतिक ज्ञानापुरते मर्यादित न राहता प्रत्यक्ष प्रकल्पांमध्ये अजाईल तत्त्वांचा वापर करणे अत्यावश्यक असल्याचे नमूद केले. नव्या तंत्रज्ञानाशी सुसंगत राहण्यासाठी सातत्याने कौशल्यवृद्धी करणे हीच काळाची गरज असल्याचे त्यांनी सांगितले.
या राष्ट्रीय चर्चासत्रात महाराष्ट्रासह विविध राज्यांतील २२ संशोधकांनी शोधनिबंध सादर केले. सादर शोधनिबंधांचे पुस्तिकेत रूपांतर करून त्याचे विमोचन मान्यवरांच्या हस्ते करण्यात आले. विशेष उल्लेखनीय बाब म्हणजे University of Wales Trinity Saint David येथील रशिदा बानू या विद्यार्थिनीने आभासी माध्यमातून आपला संशोधनप्रबंध सादर केला, ज्यामुळे चर्चासत्राला आंतरराष्ट्रीय परिमाण लाभले.
कार्यक्रम यशस्वी करण्यासाठी प्रा. मंजुनाथ मनुरे, प्रा. हेमंत कोणदे, प्रा. गायत्री लिगाडे, प्रा. गायत्री बेनगिरी, भाग्यश्री गोरे, अवंतिका जेऊरे तसेच विद्यार्थ्यांनी विशेष परिश्रम घेतले. संशोधक, प्राध्यापक आणि विद्यार्थ्यांची उत्स्फूर्त उपस्थिती चर्चासत्राच्या यशाची साक्ष देत होती.
उद्योग-शिक्षण समन्वयाचा प्रभावी नमुना ठरलेले हे चर्चासत्र विद्यार्थ्यांसाठी प्रेरणादायी आणि दिशादर्शक ठरले. बदलत्या युगात ‘अजाईल’ विचारसरणीचा स्वीकार हाच प्रगतीचा मंत्र असल्याचा ठाम संदेश या व्यासपीठावरून देण्यात आला.
