टाटा समूहाची विमान कंपनी एअर इंडिया आपल्या फ्लीट आणि ऑपरेशन्सचा विस्तार करत आहे. एअर इंडियाने यासाठी बोईंग आणि एअरबसकडून ४७० विमाने खरेदी करण्याची ऑर्डर आधीच दिली आहे. यामध्ये ७० मोठी विमाने आहेत. यासाठी कंपनीला यावर्षी ४,२०० क्रू मेंबर्स (केबिन क्रू) आणि ९०० पायलटची गरज आहे. म्हणूनच कंपनीने भरतीसाठी रिक्त जागा भरण्याचा निर्णय घेतला आहे. यानुसार एअर इंडियामध्ये विविध पदांची भरती केली जाणार आहे.
टाटा समूहाने जानेवारी २०२२ मध्ये एअर इंडियाचे अधिग्रहण केले होते. ३६ विमाने भाडेतत्त्वावर घेण्याची कंपनीची योजना आहे. यापैकी दोन बी७७७-२०० एलआर उड्डाणे आधीच त्यांच्या ताफ्यात सामील झाली आहेत. एअर इंडियाने शुक्रवारी जारी केलेल्या पत्रकात दिलेल्या माहितीनुसार २०२३ मध्ये ४,२०० प्रशिक्षणार्थी क्रू मेंबर्स आणि ९०० पायलट भरती करण्याची त्यांची योजना आहे.
एअर इंडियाकडे सध्या १४० विमाने
एअर इंडिया आणि एअर इंडिया एक्सप्रेसच्या संयुक्त ताफ्यात सध्या सुमारे १४० विमाने आहेत. यातील बहुतांश स्लिम बॉडी विमाने आहेत. एअरलाइनने ऑर्डर केलेल्या ४७० विमानांपैकी सुमारे ७० वाइड बॉडी आहेत तर ४०० सिंगल-आइसल विमाने आहेत. कंपनीला यावर्षी ३१ विमानांची डिलिव्हरी मिळेल, असे अपेक्षा व्यक्त केली जात आहे.
एअर इंडिया ग्रुपला हजारो वैमानिकांची गरज भासणार
Air India आणि Vistara च्या विलीनीकरणानंतर आणि कमी किमतीच्या एअरलाइन एअर इंडिया एक्सप्रेस आणि एअर एशिया इंडियाच्या विलीनीकरणानंतर, एअर इंडिया ग्रुप एक पूर्ण-सेवा वाहक सुरू करणार आहे. यासाठी, कंपनीला डिलिव्हरीनंतर आपल्या मोठ्या विमानांच्या ताफ्याचे संचालन करण्यासाठी हजारो वैमानिकांची आवश्यकता असेल. या ग्रुपला एअरलाइन चालवण्यासाठी ६,५०० पेक्षा जास्त वैमानिकांची आवश्यकता असू शकते, अशी माहिती समोर येत आहे. त्यामुळे या विविध पदांसाठी इच्छुक आणि पात्र उमेदवारांनी तयारी करणे गरजेचे आहे.
