माढा – तालुक्यातील अंजनगाव (खे) येथे छत्रपती शिवाजी महाराजांचा पुतळा रातोरात बसवण्यात आला असल्याने गावातील दोन गटांमध्ये तणाव निर्माण होऊन या घटनेने प्रशासकीय आणि सामाजिक पेच निर्माण झाला आहे. गावात छत्रपती शिवाजी महाराजांचा अश्वारूढ पुतळा विनापरवाना आणि रातोरात बसवल्याने दोन समाजात वादाची ठिणगी पडली. तणावाची परिस्थिती लक्षात घेऊन दिवसभर पोलिस गावात ठाण मांडून होते. एकगट मंदिर परिसरात रातोरात बसवलेला पुतळा हटवण्यासाठी तर दुसरा गट पुतळा तेथेच ठेवण्याची भूमिकेवर ठाम आहेत.
बुधवारी पहाटेच्या सुमारास फटाक्यांची आतषबाजी झाल्यानंतर मंदिराचे मानकरी फरांडे महाराज, आप्पाराव वाघमोडे यांच्यासह ग्रामस्थांना पुतळा उभारल्याचे समजताच माढा पोलिस ठाण्यात धाव घेत मंदिर परिसरात उभारलेला पुतळा हटवण्याची मागणी केली. याची तात्काळ दखल घेत माढा पोलिसांनी घटनास्थळी धाव घेत प्रकरण हाताळण्याचा प्रयत्न केला. परंतु दुसरा गट पुतळा हलवण्यास तयार नसल्याने तणावाचे वातावरण निर्माण झाले.
बुधवारी रात्री प्रशासनाकडून पुतळा हटवण्याचा निर्णयाने आंदोलन हिंसक वळणावर गेल्याने या ठिकाणी दगडफेक झाली ही परिस्थिती पोलिसांच्या हाताबाहेर गेल्याने पोलिसांकडून लाठी चार्ज करण्यात आला होता. यात काही आंदोलक व १५ हून अधिक पोलीस जखमी झाले होते. यावेळी काही आंदोलन कर्त्यांना पोलिसांनी ताब्यात घेतले आहे. ही परिस्थिती लक्षात घेऊन गुरुवारी पोलीस प्रशासनाने मोठा पोलीस बंदोबस्त येथे तैनात केला आहे.
या ठिकाणी पोलीस व प्रशासनाच्या वतीने दोन्ही गटात समझोता करून हा वाद मिटवण्यासाठी प्रयत्न चालू आहेत.
दोन्ही गटांना प्रशासनाच्या वतीने शांतता राखण्याचे आवाहन करण्यात येत आहे.
छत्रपती शिवरायांचा पुतळा मंदिर प्रवेशद्वारात
खेलोबा देवा प्रमाणेच आम्ही छत्रपती शिवाजी महाराज आमचे कुलदैवत मानतो. परंतु ज्या जागेवर शिवरायांचा पुतळा उभा केला आहे, ती जागा मंदिराच्या प्रवेशद्वारावर येत असल्याने धार्मिक विधी करण्यास अडथळा निर्माण होणार आहे. संबंधितांनी इतर ठिकाणी महाराजांचा पुतळा उभा करावा, आम्ही त्यास मदत करू.
राजाभाऊ वाघमोडे महाराज, मुख्य मानकरी
ग्रामपंचायतीकडे तीन आठवड्यापूर्वी केला होता अर्ज
तीन आठवड्यापूर्वी दत्तात्रय पाटेकर, ओंकार चव्हाण आणि गजानन कृपाळयांनी अंजनगाव खे ग्रामपंचायतीकडे पुतळा उभा करण्यासाठी अर्ज केला होता. ग्रामपंचायत प्रशासनाने रितसर परवानगी घेऊन पुतळा उभारण्याचे सांगत अर्ज स्वीकारण्यास नकार दिला.पोलिस प्रशासनास माहिती कळल्यानंतर पोलिसांनी तिघांना नोटिस बजावली होती,असे सहाय्यक पोलिस निरीक्षक रोहित शिंदे यांनी सांगितले.
