वेळापूर – जम्मू काश्मीर येथील श्री अमरनाथ यात्रा २०२६ साठीची नोंदणी १५ एप्रिलपासून सुरू होणार आहे. या संदर्भात, विशेषतः यात्रेकरूंसाठी आवश्यक असलेल्या वैद्यकीय तपासण्यांबाबत, श्री अमरनाथ जी श्राईन बोर्डाने आपल्या अधिकृत वेबसाइटवर महाराष्ट्र राज्यातील अधिकृत रुग्णालये आणि डॉक्टरांची यादी नुकतीच प्रसिद्ध केली आहे. सदर यादीनुसार, केवळ महाराष्ट्रातील शहरी भागांमध्ये, विशेषतः मुंबई आणि ठाणे येथे स्थित असलेली रुग्णालये आणि डॉक्टरच यात्रेसाठी जाणाऱ्या भाविकांना वैद्यकीय तपासणी करण्यासाठी आणि प्रमाणपत्रे देण्यासाठी अधिकृत करण्यात आलेली आहेत.
परिणामी, महाराष्ट्रातील ग्रामीण भागातील आणि इतर जिल्ह्यांतील भाविकांना तीर्थयात्रेबाबत प्रचंड अडचणींचा सामना करावा लागत आहे, कारण केवळ वैद्यकीय तपासणीसाठी त्यांना राज्यभर शेकडो किलोमीटरचा प्रवास करावा लागत आहे. मुंबई, ठाणे येथे जाऊन मेडिकल तपासणी करून वैद्यकीय प्रमाणपत्र प्राप्त झाल्यास महाराष्ट्र राज्यातील भाविक श्री अमरनाथ यात्रा २०२६ करू शकणार आहेत.
त्यामुळे भारतीय जनता पार्टीचे अकलूज मंडल सरचिटणीस ओंकार रेखा दत्तात्रय आडत यांनी श्री अमरनाथ जी श्राईन बोर्ड, जम्मू काश्मीर यांना ईमेलद्वारे निवेदन पाठवून राज्यभरातील सर्व प्रमुख शहरांमधील रुग्णालयांना आणि डॉक्टरांना वैद्यकीय तपासणी करण्याचे आणि वैद्यकीय प्रमाणपत्रे देण्याचे अधिकार देण्यात यावेत तसेच राज्यातील सर्व सरकारी जिल्हा रुग्णालये, उप-जिल्हा रुग्णालये आणि ग्रामीण रुग्णालयांनाही हा अधिकार देण्यात यावा आणि या सुविधांची अद्ययावत यादी तात्काळ प्रसिद्ध करावी अशी विनंती केली आहे.
श्री अमरनाथ यात्रा २०२६ साठी इतर शहरातील प्रमुख रुग्णालये व जिल्हा रुग्णालय व उपजिल्हा रुग्णालयात वैद्यकीय तपासणीचे अधिकृत अधिकार प्रदान करण्याबाबत श्राईन बोर्डाने सकारात्मक निर्णय घेतल्यास, महाराष्ट्र राज्यातील हजारो भाविकांना एक सुखकर आणि सुखद तीर्थयात्रेचा अनुभव सुनिश्चित करण्यासाठी अमूल्य साहाय्य मिळेल असे आवाहन त्यांनी केले आहे.
—————————————
महाराष्ट्रातून मोठ्या प्रमाणात भाविक होतात सहभागी !
हिंदू धर्मात अतिशय पवित्र मानल्या जाणाऱ्या अमरनाथ यात्रेत महाराष्ट्र राज्यातील अनेक जिल्ह्यातील हजारो भाविक दरवर्षी सहभागी होतात. मात्र आता वैद्यकीय तपासणी फक्त मुंबई, ठाणे अशा शहरी भागात होणार असल्याने भाविकांची संख्येत घट होणार आहे.
—————————————
यापूर्वी प्रमाणे ग्रामीण भागातही वैद्यकीय तपासणीचे अधिकार द्यावेत : ओंकार आडत
यापूर्वी अमरनाथ जी यात्रेत सहभागी होण्यासाठी राज्यातील ग्रामीण भागातील रुग्णालये व डॉक्टर्स कडून केलेली वैद्यकीय तपासणी ग्राह्य धरली जात होती मात्र यावर्षी ठराविक रुग्णालयांना हे अधिकार दिल्याने भाविकांना अडचणींचा सामना करावा लागणार आहे!
ओंकार आडत, सरचिटणीस, अकलूज मंडल, भारतीय जनता पार्टी
