सोलापूर : “अभ्यास हीच खरी आदरांजली” हा संदेश देत डॉ. वै. स्मृ. शा. वैद्यकीय महाविद्यालय, सोलापूर येथे सलग १८ तास अध्ययन अभियान व स्पर्धेचे प्रभावी आयोजन करण्यात आले. महामानव डॉ. बाबासाहेब आंबेडकर आणि महात्मा ज्योतिराव फुले यांच्या जयंतीनिमित्त हा अभिनव उपक्रम राबविण्यात आला.
महाविद्यालयाचे अधिष्ठाता डॉ. ऋत्विक जयकर यांच्या मार्गदर्शनाखाली वैद्यकीय संशोधन संस्थेमार्फत सोमवार, दि. १३ एप्रिल २०२६ रोजी पहाटे ६ वाजता स्पर्धेला प्रारंभ झाला. उपाधिष्ठाता डॉ. चंद्रकांत वाघमारे,
बालरोग विभाग प्रमुख डॉ. सुधीर सरवदे यांच्या हस्ते डॉ. बाबासाहेब आंबेडकर यांच्या प्रतिमेला अभिवादन करून स्पर्धेचे उद्घाटन करण्यात आले.या प्रसंगी आयोजक डॉ. औदुंबर मस्के, डॉ. गजानन जत्ती, डॉ. शुक्लधन रोडे, अॅड. रवी गजधाने, सुलभा दातार, अशोक मस्के, विशाल इरागंटी आदी मान्यवर उपस्थित होते.
स्पर्धेअंतर्गत विद्यार्थ्यांना सकाळी ६ वाजता १७ तासांत पूर्ण होईल असा अभ्यासक्रम देण्यात आला. त्यानंतर रात्री १२ वाजता त्याच अभ्यासक्रमावर आधारित परीक्षा घेण्यात येणार आहे. परीक्षेतील गुणांबरोबरच विद्यार्थ्यांच्या शिस्तीचाही विचार करून अंतिम निकाल जाहीर केला जाणार आहे. स्पर्धेसाठी विशेष आचारसंहिता तयार करण्यात आली असून प्रत्येक विद्यार्थ्याला प्रारंभी १०० गुण देण्यात आले आहेत. अंतिम बक्षीसासाठी शिस्तीचे उर्वरित गुण आणि परीक्षेतील गुण यांची एकत्रित गणना करण्यात येणार असल्याचे आयोजकांनी सांगितले.
या उपक्रमाचे पर्यवेक्षण श्रीमती मंदाकिनी तांबे, डॉ. हेमलता रोकडे, डॉ. जयश्री खिस्ते, डॉ. सचिन बंदीछोडे, डॉ. वृषाली वानखडे, डॉ. कृष्णप्रिया सामलेटी, डॉ. प्रशांत शिरुरे, डॉ. अंकुर गुणावत, डॉ. संचित खरे, डॉ. एम. एम. पिरजादे व विरेश महाजनी यांनी केले.
“सिम्बॉल ऑफ नॉलेज” म्हणून ओळख असलेले आणि ३२ पदव्या प्राप्त करणारे डॉ. बाबासाहेब आंबेडकर यांच्या कार्याला अभ्यासातून अभिवादन करणे हीच खरी आदरांजली असल्याची भावना यावेळी व्यक्त करण्यात आली. उपक्रम यशस्वी करण्यासाठी वैद्यकीय अधीक्षक डॉ. संपत्ती तोडकर, प्रशासकीय अधिकारी संजय देशमुख व तलवार, ग्रंथपाल श्रीमती अर्चना नाचरे व रमेश चाटे यांनी परिश्रम घेतले.
