सोलापूर – महाराष्ट्र क्रिकेट असोसिएशनच्या आंतर-जिल्हा क्रिकेट स्पर्धेत सोलापूरच्या महिला संघाने आपली विजयी घोडदौड कायम ठेवली आहे. विभावरी देवकते आणि भक्ती पवार यांच्या अचूक गोलंदाजीच्या जोरावर सोलापूरने जळगावचा ८ गडी राखून धुव्वा उडवला. अवघ्या ५२ धावांचे लक्ष्य सोलापूरने १०.३ षटकांत सहज पार केले.
नाणेफेक जिंकून प्रथम फलंदाजी करणाऱ्या जळगाव संघाला सोलापूरच्या शिस्तबद्ध माऱ्यासमोर अक्षरशः शरणागती पत्करावी लागली. सोलापूरच्या भक्ती पवारने ४ षटकांत अवघ्या ७ धावा देत ३ बळी टिपले, तर विभावरी देवकतेने १६ धावांच्या मोबदल्यात ३ फलंदाजांना तंबूत धाडले. जळगावकडून केवळ साक्षी गोरे (१२ धावा) हिलाच दुहेरी धावसंख्या गाठता आली. इतर फलंदाज अपयशी ठरल्याने जळगावचा संपूर्ण संघ १६ व्या षटकात ५२ धावांत गारद झाला.
आर्या आणि साक्षीची आक्रमक फटकेबाजी
विजयी लक्ष्याचा पाठलाग करताना सोलापूरच्या सलामीवीरांनी मैदानावर वर्चस्व गाजवले. आर्या उमापने अवघ्या १९ चेंडूंत ४ चौकारांच्या मदतीने २६ धावांची वेगवान खेळी केली. तिला साक्षी वाघमोडेने (१८ धावा) भक्कम साथ देत संघाला विजयाच्या उंबरठ्यावर नेऊन ठेवले. सोलापूरने १०.३ षटकांत २ बाद ५६ धावा करत दिमाखदार विजय मिळवला.
उत्कृष्ट गोलंदाजीचे प्रदर्शन करत ४ षटकांत १ निर्धाव षटक टाकून १६ धावांत ३ बळी घेणाऱ्या विभावरी देवकते हिला ‘सामनावीर’ पुरस्कार देऊन गौरवण्यात आले.
संक्षिप्त धावफलक:
- जळगाव: १६ षटकांत सर्वबाद ५२ (साक्षी गोरे १२; भक्ती पवार ३/७, विभावरी देवकाते ३/१६) पराभूत विरुद्ध
- सोलापूर: १०.३ षटकांत २ बाद ५६ (आर्या उमाप २६, साक्षी वाघमोडे १८)
