सांगोला – सध्या कडक उन्हाळ्यात सांगोला बाजारपेठेत रानमेवा म्हणून ओळखली जाणारी डोंगरची काळी मैना म्हणजेच करवंदे आणि जांभळे विक्रीसाठी दाखल झाली आहेत. आरोग्यासाठी अत्यंत फायदेशीर असलेल्या या फळांना खरेदी करताना नागरिक दिसत आहेत. विक्रेते: मुख्य बाजारपेठा, मेन रोड, चौका चौकात गाड्यांवर व टोपल्यांमध्ये हा रानमेवा सजवून विक्री करताना दिसत आहेत.
करवंद हे भारतातील विशेषतः महाराष्ट्रातील डोंगरकपारीत आणि कोकण भागात आढळणारे एक अत्यंत लोकप्रिय व गुणकारी रानमेवा देणारे काटेरी झुडूप आहे. याला डोंगरची काळी मैना म्हणून ओळखले जाते. करवंदामध्ये व्हिटॅमिन सी आणि लोह भरपूर प्रमाणात असते. रोगप्रतिकारक शक्ती वाढवणे, पचनक्रिया सुधारणे, रक्त वाढवणे तसेच उन्हाळ्यात शरीराला थंडावा देण्यासाठी हे फळ उत्तम कार्य करते.
जांभूळ हे चवीला गोड-तुरट आणि आयुर्वेदात औषधी गुणधर्मांनी परिपूर्ण मानले गेलेले सदाहरित फळझाड आहे. जांभळाचे फळ, बिया आणि झाडाची साल हे सर्वच भाग आरोग्यासाठी अत्यंत गुणकारी आहेत. जांभळाचा मधुमेह, पाचक आणि पोटदुखी, रक्त शुद्धीकरण, हिरड्या आणि दातांचे आजार, वजन नियंत्रण यासाठी मदत होते.
चौकट-
डोंगरची काळी मैना म्हणजेच करवंदे याची खरेदी रायगड जिल्ह्यातील तसेच जांभळाची खरेदी स्थानिक शेतकऱ्यांकडून होत आहे. सध्या जांभूळ २०० रुपये किलो तर करवंदे पण २०० रुपये किलो या दराने विकली जात आहेत. दुपारी चांगलेच ऊन पडत असल्यामुळे नागरिकांचा अल्प प्रतिसाद मिळत आहे परंतु नागरिक हा रानमेवा आवडीने खरेदी करत आहेत. तसेच पुढील ८ ते १० दिवस करवंदे विक्रीस राहील.
– दत्ता माने, करवंद व जांभूळ यांचे व्यापारी, सांगोला
