सोलापूर – ग्रामीण भागातील नागरिकांना उपचारासाठी खासगी रुग्णालयांकडे धाव घ्यावी लागू नये, यासाठी प्राथमिक आरोग्य केंद्रे आणि शासकीय आरोग्य यंत्रणा अधिक सक्षम करण्याची गरज असल्याचे मत जिल्हा परिषदेच्या आरोग्य व शिक्षण समितीचे सभापती चेतनसिंह केदार यांनी व्यक्त केले. या बैठकीस समितीचे सदस्य सोनाली कडते, संगीता दुधाळ, संदीप टेळे, मीनाक्षी रोंगे, शोभा खटकाळे, नागनाथ भोसले, सविता कोकाटे आणि चंद्रकांत भालके उपस्थित होते. तसेच डॉ. शेगर, डॉ. घाडगे, डॉ. जाधव, डॉ. अभिवंत, डॉ. खांडेकर, सर्व तालुका आरोग्य अधिकारी आणि विभागीय अधिकारी उपस्थित होते.
जिल्हा परिषदेच्या आरोग्य समितीच्या सभेत त्यांनी आरोग्य विभागाला लोकाभिमुख सेवा देण्याच्या सूचना करत आषाढी वारीच्या तयारीचा आढावा घेतला.जिल्हा परिषदेत झालेल्या या बैठकीत जिल्हा आरोग्य अधिकारी डॉ. सतीश कोपूरवाड यांनी समिती सदस्यांचे स्वागत करून मागील सभेचे इतिवृत्त सादर केले. त्यानंतर जिल्ह्यातील विविध आरोग्य योजनांच्या अंमलबजावणीवर चर्चा करण्यात आली.
सभापती चेतनसिंह केदार यांनी माता-बाल संगोपन, नियमित लसीकरण, क्षयरोग निर्मूलन आणि कुष्ठरोग नियंत्रण कार्यक्रम अधिक प्रभावीपणे राबविण्याच्या सूचना दिल्या. ग्रामीण आणि दुर्गम भागातील नागरिकांपर्यंत आरोग्य सेवा पोहोचविण्यासाठी अधिकारी आणि कर्मचारी यांनी अधिक जबाबदारीने काम करावे, असे त्यांनी सांगितले.
आगामी आषाढी वारीच्या पार्श्वभूमीवर पालखी मार्गावरील प्राथमिक आरोग्य केंद्रे, ग्रामीण रुग्णालये आणि आरोग्य पथकांची तयारी वेळेत पूर्ण करण्याचे निर्देशही यावेळी देण्यात आले. वारकऱ्यांना तातडीच्या आरोग्य सुविधा उपलब्ध व्हाव्यात यासाठी आवश्यक औषधसाठा, वैद्यकीय उपकरणे आणि मनुष्यबळ उपलब्ध ठेवण्यावर भर देण्यात आला.
विशेष म्हणजे, पालखी मार्गावरील कोणत्याही आरोग्य संस्थेत कर्मचारी पदे रिक्त राहू नयेत, अशी स्पष्ट सूचना सभापतींनी दिली. वारी काळात आपत्कालीन वैद्यकीय सेवा, रुग्णवाहिका व्यवस्था, उष्माघात आणि संसर्गजन्य आजारांवरील नियंत्रणासाठी स्वतंत्र कृती आराखडा तयार करण्याचे निर्देशही बैठकीत देण्यात आले.
कोट
आरोग्य सेवा अधिक सक्षम करून सर्वसामान्य नागरिकांना दर्जेदार आणि मोफत उपचार उपलब्ध करून देण्याच्या दृष्टीने ही बैठक महत्त्वपूर्ण आहे. विशेषतः आषाढी वारीसारख्या मोठ्या धार्मिक सोहळ्यापूर्वी आरोग्य यंत्रणा सज्ज ठेवण्याचा स्पष्ट संदेश या बैठकीतून देण्यात आला.
– चेतनसिंह केदार सावंत सभापती आरोग्य विभाग
