बार्शी – शहरातील व्हळे शेलगाव चौक परिसरात भाड्याने राहत असलेल्या एका फिरत्या व्यावसायिकाची मोटारसायकल अज्ञात चोरट्याने चोरुन नेल्याची घटना उघडकीस आली आहे. या प्रकरणी बार्शी शहर पोलीस ठाण्यात अज्ञात चोरट्याविरुद्ध गुन्हा दाखल करण्यात आला असून पोलिसांनी तपास सुरु केला आहे.
पोलिसांकडून मिळालेल्या माहितीनुसार, सरदार विजयसिंग बंजारा (वय २८), मूळ रा. तीन टापरी, बंजारा वस्ती, ता. रामगंजमंडी, जि. कोटा (राजस्थान) हे बाज विक्रीचा व्यवसाय करतात. व्यवसायानिमित्त ते आपल्या सहकाऱ्यांसह विविध शहरांमध्ये फिरत असतात. सध्या ते बार्शी शहरातील व्हळे शेलगाव चौक येथे प्रसाद आण्णासाहेब पाटील यांच्या शेडमध्ये भाड्याने राहत होते.
दि. १ जून २०२६ रोजी दिवसभर बाज विक्रीचा व्यवसाय करुन सरदार बंजारा हे सायंकाळी सुमारे ७ वाजता राहत्या ठिकाणी परतले. त्यांनी त्यांच्या वापरातील ग्रे व काळ्या रंगाची होंडा शाईन मोटारसायकल (क्रमांक RJ-33-SJ-4356) शेडच्या बाजूला हँडल लॉक करुन उभी केली होती. रात्री जेवण करुन सर्वजण झोपले.
मात्र, दुसऱ्या दिवशी म्हणजेच २ जून रोजी सकाळी सुमारे ६ वाजता उठून बाहेर आल्यानंतर त्यांना मोटारसायकल जागेवर दिसून आली नाही. त्यानंतर त्यांनी सहकाऱ्यांच्या मदतीने परिसरासह बार्शी शहरात आणि आजूबाजूच्या भागात मोटारसायकलचा शोध घेतला. मात्र अनेक दिवस शोध घेऊनही वाहनाचा कोणताही शोध लागला नाही.
अखेर मोटारसायकल चोरीस गेल्याची खात्री झाल्यानंतर त्यांनी बार्शी शहर पोलीस ठाण्यात तक्रार दाखल केली. चोरीस गेलेली होंडा शाईन कंपनीची मोटारसायकल असल्याचे फिर्यादीत नमूद करण्यात आले आहे.या प्रकरणी अज्ञात चोरट्याविरुद्ध गुन्हा दाखल करण्यात आला असून पुढील तपास पोलीस करत आहेत.
