मुंबई : शिक्षण म्हणजे केवळ पाठ्यपुस्तकांपुरते मर्यादित नसून विद्यार्थ्यांच्या व्यक्तिमत्त्व विकासासाठी आवश्यक असलेल्या जीवनकौशल्यांचे संवर्धन करणेही तितकेच महत्त्वाचे आहे. याच विचारातून दादर येथील छबिलदास इंग्लिश मीडियम स्कूल (CBSE Affiliated) तर्फे विद्यार्थ्यांसाठी आयोजित करण्यात आलेली ‘मास्टरशेफ स्पर्धा २०२६-२७’ उत्साहपूर्ण वातावरणात संपन्न झाली. २४ व २५ जून २०२६ रोजी झालेल्या या दोन दिवसीय स्पर्धेला विद्यार्थी, पालक आणि शिक्षकांचा उत्स्फूर्त प्रतिसाद लाभला.
उन्हाळ्याच्या सुट्टीचा विधायक उपयोग व्हावा, विद्यार्थ्यांमध्ये स्वावलंबनाची भावना रुजावी, तसेच दैनंदिन जीवनात उपयोगी पडणारी कौशल्ये आत्मसात करण्यास प्रोत्साहन मिळावे या उद्देशाने शाळेने विद्यार्थ्यांना महिनाभर विविध खाद्यपदार्थ तयार करण्याचा सराव करण्यासाठी प्रेरित केले होते. त्यातूनच या अनोख्या स्पर्धेची निर्मिती झाली.
स्पर्धेचे उद्घाटन दादरमधील प्रसिद्ध मामा काणे उपाहारगृहाचे मालक श्रीधर कमलाकर काणे यांच्या हस्ते दीपप्रज्वलन करून करण्यात आले. यावेळी ‘चैतन्य – अस्सल मालवणी भोजनगृह’च्या संचालिका सायली वाळके यांचीही विशेष उपस्थिती लाभली होती.
संस्थेचे अध्यक्ष शैलेंद्र साळवी म्हणाले, “विद्यार्थ्यांच्या सर्वांगीण विकासासाठी शैक्षणिक ज्ञानाबरोबरच जीवनोपयोगी कौशल्यांचे शिक्षणही तितकेच आवश्यक आहे. ‘मास्टरशेफ’सारखे उपक्रम विद्यार्थ्यांचा आत्मविश्वास, सर्जनशीलता आणि स्वावलंबन वाढविण्यास मोलाची मदत करतात.”
शाळेच्या मुख्याध्यापिका सौ. कोमल मॅडम यांनी सांगितले, “प्रत्येक विद्यार्थ्यामध्ये एखादा सुप्त गुण दडलेला असतो. त्या गुणांना योग्य व्यासपीठ उपलब्ध करून देणे आणि शिक्षणाला आनंददायी अनुभव बनविणे हा या उपक्रमामागील मुख्य उद्देश आहे.”
या स्पर्धेचे आयोजन अत्यंत कल्पक आणि नियोजनबद्ध तसेच एखाद्या टेलिव्हिजन रियालटी शो सारखे करण्यात आले होते. विद्यार्थ्यांच्या पाककला कौशल्यांना वाव मिळावा तसेच त्यांना खाद्यव्यवसाय क्षेत्रातील अनुभवी व्यक्तींचे मार्गदर्शन लाभावे यासाठी नामवंत मान्यवरांना परीक्षक म्हणून आमंत्रित करण्यात आले होते.
उद्घाटन समारंभाचे प्रमुख पाहुणे श्रीधर काणे म्हणाले, “विद्यार्थ्यांनी तयार केलेल्या पदार्थांमध्ये कल्पकता, मेहनत आणि आत्मविश्वास स्पष्टपणे दिसून आला. अशा उपक्रमांमधून मुलांमध्ये जीवनभर उपयोगी पडणारी कौशल्ये विकसित होतात.”
पहिल्या दिवशी ग्रेड ६ मधील विद्यार्थ्यांनी विविध प्रकारचे पोहे आणि चहा तयार करून आपल्या पाककलेची झलक सादर केली. विद्यार्थ्यांच्या कल्पक सादरीकरणाने उपस्थित मान्यवरांची मने जिंकली.
ग्रेड ६ निकाल :
* प्रथम : कवीश कोलते
* द्वितीय : आदित्य पाटील
* तृतीय : अथर्व सुर्वे
* उत्तेजनार्थ : पर्व खंडोर
स्पर्धेच्या दुसऱ्या दिवशी मराठी मनोरंजन क्षेत्रातील अभिनेते, लेखक, दिग्दर्शक तसेच ‘पिठी भात’ उपाहारगृहाचे मालक *समीर खांडेकर* प्रमुख पाहुणे म्हणून उपस्थित होते. विद्यार्थ्यांनी तयार केलेल्या खाद्यपदार्थांचे कौतुक करत त्यांनी शाळेच्या या अभिनव उपक्रमाचे विशेष अभिनंदन केले.
यावेळी समीर खांडेकर म्हणाले, “छबिलदास शाळेने विद्यार्थ्यांच्या सुप्त कलागुणांना व्यासपीठ उपलब्ध करून देत शिक्षणाची व्यापक संकल्पना प्रत्यक्षात साकारली आहे. अशा उपक्रमांमधून विद्यार्थ्यांचा आत्मविश्वास आणि सर्जनशीलता निश्चितच वाढते.”
दुसऱ्या दिवशी ग्रेड ७ आणि ग्रेड ८ मधील विद्यार्थ्यांनी स्वादिष्ट कटलेट, पराठे आणि चवदार चहा तयार करून परीक्षकांची मने जिंकली.
*ग्रेड ७ निकाल :*
* प्रथम : स्वर्णिका सुर्वे
* द्वितीय : आराध्या विरले
* तृतीय : अवनी राऊळ
* उत्तेजनार्थ : श्राव्या पालवणकर
ग्रेड ८ निकाल :
* प्रथम : गौरी पोतदार
* द्वितीय : अजान शेख
* तृतीय : आरोही शाह
* उत्तेजनार्थ : क्रिशवी पटेल
या दोन दिवसीय स्पर्धेत एकूण ३८ विद्यार्थ्यांनी प्रत्यक्ष सहभाग नोंदविला. त्यापैकी २० विद्यार्थ्यांना सहभाग व गुणवत्ता प्रमाणपत्रे प्रदान करून गौरविण्यात आले.
ग्रेड ६ मधील विद्यार्थ्यांनी पोहे व चहा, ग्रेड ७ मधील विद्यार्थ्यांनी कटलेट व चहा, तर ग्रेड ८ मधील विद्यार्थ्यांनी पराठे व चहा तयार करून आपल्या पाककौशल्याचा उत्कृष्ट आविष्कार घडविला. विद्यार्थ्यांची कल्पकता, सादरीकरण कौशल्य, स्वच्छता, चव आणि आत्मविश्वास यांचे परीक्षकांनी विशेष कौतुक केले.
या उपक्रमाच्या यशस्वी आयोजनासाठी शाळेतील सर्व शिक्षक, शिक्षकेतर कर्मचारी तसेच विद्यार्थ्यांनी परिश्रम घेतले. शिक्षणासोबत जीवनकौशल्यांचा विकास घडवून आणणाऱ्या या अभिनव उपक्रमामुळे छबिलदास इंग्लिश मीडियम स्कूलने विद्यार्थ्यांच्या सर्वांगीण विकासाच्या दिशेने आणखी एक महत्त्वपूर्ण पाऊल उचलल्याची भावना उपस्थितांनी व्यक्त केली.
