सोलापूर – जिल्हा परिषदेच्या आरोग्य विभागातील मुख्य औषध भांडाराच्या फार्मासिस्ट नियुक्तीवरून नवा वाद निर्माण झाला आहे. संबंधित नियुक्तीसाठी विभागीय आयुक्तांना चुकीची माहिती व प्रमाणपत्र सादर करून दिशाभूल करण्यात आल्याचा आरोप होत असून, या नियुक्ती प्रक्रियेच्या पारदर्शकतेवर प्रश्नचिन्ह उपस्थित झाले आहे. विशेष म्हणजे, संबंधित फार्मासिस्टने अधिकृत पदभार स्वीकारण्यापूर्वीच आषाढी वारीसाठी सुमारे १० कोटी रुपयांच्या औषध खरेदी प्रक्रियेत सहभाग घेतल्याची बाबही चर्चेचा विषय ठरली आहे.
जिल्हा परिषदेतून प्राप्त झालेल्या माहितीनुसार, जिल्हा परिषदेच्या मुख्य औषध भांडारात प्रमुख फार्मासिस्ट पद रिक्त झाल्यानंतर लीना पुजारी यांची नियुक्ती करण्यात आली. मात्र, या नियुक्तीसाठी आवश्यक अनुभव आणि बदलीसंदर्भातील अटी पूर्ण नसतानाही प्रशासनाने अनुकूल प्रमाणपत्र दिल्याचा आरोप केला जात आहे. यासाठी जिल्ह्यातील एका लोकप्रतिनिधीच्या शिफारशीचा आधार घेण्यात आल्याचीही चर्चा आहे.
आरोपानुसार, तत्कालीन जिल्हा आरोग्य अधिकाऱ्यांनी संबंधित फार्मासिस्टला मुख्य औषध भांडाराचा अनुभव असल्याचे आणि बदलीसाठी आवश्यक अटी पूर्ण असल्याचे प्रमाणित केले. त्यानंतर प्रशासन विभागातील वरिष्ठ अधिकाऱ्यांच्या स्वाक्षऱ्यांनिशी हा प्रस्ताव विभागीय आयुक्तांकडे पाठविण्यात आला आणि त्यास मंजुरी मिळाली. मात्र, संबंधित अधिकाऱ्यांनी यापूर्वी मुख्य औषध भांडारात काम केले नसल्याचा दावा करण्यात येत असल्याने या प्रमाणपत्राच्या सत्यतेबाबत प्रश्न उपस्थित होत आहेत.
याचबरोबर, मुख्य औषध भांडारात अनुभवी सहाय्यक फार्मासिस्ट उपलब्ध असताना नव्याने नियुक्ती करण्याची गरज काय होती, असा सवालही उपस्थित केला जात आहे. या प्रकरणामुळे जिल्हा परिषदेच्या आरोग्य विभागातील नियुक्ती प्रक्रिया आणि प्रशासकीय निर्णयांबाबत पारदर्शकतेची मागणी जोर धरू लागली आहे. संबंधित फार्मासिस्ट लीना पुजारी यांनी घेरडी, वळसंग आणि अनगर येथे सेवा बजावल्याचे मान्य केले असून, मुख्य औषध भांडाराचा अधिकृत पदभार मिळाला नसल्याचेही स्पष्ट केले आहे. मात्र, त्याच काळात आषाढी वारीसाठी औषध खरेदीची प्रक्रिया सुरू असल्याची चर्चा प्रशासनात रंगली आहे.
कोट
फार्मासिस्ट नियुक्ती ही पूर्वीच्या कालावधीतील असून विभागीय आयुक्तांच्या स्तरावरील निर्णय असल्याने भाष्य करणे उचित नसल्याचे सांगितले. जिल्हा आरोग्य अधिकारी सतीश कोपुरवाड यांनी सांगितले.
कोट
या प्रकरणाची माध्यमांतून चर्चा सुरू झाल्यानंतर गंभीर दखल घेतली आहे. नियुक्ती प्रक्रियेतील सर्व बाबींची चौकशी करून आवश्यक ती कारवाई केली जाईल, असे जिल्हा परिषदेचे आरोग्य व शिक्षण सभापती चेतनसिंह केदार यांनी स्पष्ट केले.
कोट
मी यापूर्वी घेरडी, वळसंग व अनगर प्राथमिक आरोग्य केंद्रात सेवा केली आहे. औषध भांडार येथे वरिष्ठ औषध निर्माण अधिकारी पदावर माझी नियुक्ती नियमानुसार झाली आहे. विभागीय आयुक्तांनी माझ्या नियुक्तीचे आदेश काढले आहेत. वरिष्ठ औषध निर्माण अधिकारी पदावर असलेले सोळंकी हे सेवानिवृत्त झाले आहेत. त्यांनी मी या ठिकाणी काम करू नये, यासाठी गेली साडेसहा महिने मता पदभार दिला नाही.
– लीना पुजारी, औषध निर्माण अधिकारी
कोट
लीना पुजारी यांनी आरोग्य केंद्रावर औषध निर्माण अधिकारी पदावर काम करत असताना जिल्हा औषध भांडार येथे भांडारपाल पदाचा कार्यभार सांभाळल्याचे सांगून वरिष्ठांची दिशाभूल केली आहे. शिवाय ज्येष्ठता यादीत माझा २५ वा क्रमांक असताना ३६ व्या क्रमांकावरीत पुजारी यांना कशी नियुक्ती मिळू शकते? यामुळे पुजारी यांची वरिष्ठ औषध निर्माण अधिकारी पदावरील नियुक्ती चुकीच्या पद्धतीने झाली आहे.
– प्रवीण नडगिडे, औषध निर्माण अधिकारी
