मोडनिंब – सीना-माढा उपसा सिंचन योजनेच्या डी.वाय. क्रमांक ८ मधून टेल टू हेड पद्धतीने तातडीने पाणी सोडावे, अन्यथा महाराष्ट्र नवनिर्माण सेनेच्या वतीने शेतकऱ्यांसह सोलापूर येथील कार्यालयासमोर अर्धनग्न व हलगीनाद आंदोलन करण्यात येईल, असा इशारा मनसेचे जिल्हाध्यक्ष प्रशांत गिड्डे यांनी दिला.याबाबत कार्यकारी अभियंता सचिन पवार यांना लेखी निवेदन देण्यात आले. माहितीस्तव सदर निवेदनाची प्रत पोलिस आयुक्तालय व जिल्हाधिकारी यांना देण्यात आली. यावेळी विलास सावंत, रावसाहेब सावंत, बापू माने, ईश्वर हागे, विक्रम माने यांच्यासह शेतकरी उपस्थित होते.सदर निवेदनात म्हटले आहे की, यंदा कमी पाऊस झाल्यामुळे मोडनिंब, जाधववाडी, बैरागवाडी व अरण परिसरात पाण्याची तीव्र टंचाई निर्माण झाली आहे. मागील पाण्याच्या आवर्तनात या भागाला अत्यल्प पाणी मिळाल्याने शेतकऱ्यांवर अन्याय झाला. आजही समाधानकारक पाऊस नसल्याने अनेक बोअरवेल अवघ्या पाच ते दहा मिनिटांत कोरड्या पडत असून, जनावरांच्या पिण्याच्या पाण्याचाही गंभीर प्रश्न निर्माण झाला आहे.यापूर्वी उपविभागीय अधिकाऱ्यांची भेट घेऊन पाणी सोडण्याची मागणी करण्यात आली होती. मात्र, पाणी सोडण्याचे अधिकार कार्यकारी अभियंत्यांकडे असल्याचे सांगण्यात आल्याने त्यांना प्रत्यक्ष निवेदन देऊन सात दिवसांच्या आत वितरिका क्रमांक ८ टेल टू हेड पद्धतीने सुरू करण्याची मागणी करण्यात आली असल्याचे गिड्डे यांनी सांगितले. मागणी मान्य न झाल्यास मोडनिंब, अरण, जाधववाडी व बैरागवाडी परिसरातील शेतकऱ्यांसह सोमवार (दि.१०) रोजी सोलापूर येथे अर्धनग्न व हलगीनाद आंदोलन करण्यात येईल, असा इशारा मनसे जिल्हाध्यक्ष प्रशांत गिड्डे यांनी दिला.
