सोलापूर : जयघोष, ढोल-ताशांचा निनाद, डॉल्बीचा दणदणाट, रंगीबेरंगी विद्युत रोषणाई आणि महापुरुषांच्या जीवनकार्यावर आधारित प्रबोधनात्मक देखाव्यांनी शहरातील वातावरण भारावून गेले. साहित्यरत्न अण्णाभाऊ साठे यांच्या १०६व्या जयंती महोत्सवाची रविवारी दिमाखदार मिरवणुकीने सांगता झाली. विविध सामाजिक संदेश देणारे आकर्षक देखावे हे मिरवणुकीचे प्रमुख वैशिष्ट्य ठरले. सुमारे ५५ मंडळांनी सहभाग घेतल्याने मिरवणुकीला भव्य स्वरूप प्राप्त झाले.
साहित्यरत्न अण्णाभाऊ साठे यांच्या १०६व्या जयंती महोत्सवाला गुरुवारी (दि. १ ऑगस्ट) सार्वजनिक मंडळांच्या वतीने प्रतिमेची मनोभावे प्रतिष्ठापना करून सुरुवात झाली होती. साहित्यरत्न अण्णाभाऊ साठे मध्यवर्ती जयंती महोत्सव समितीच्या वतीने विविध कार्यक्रमांचे आयोजन करण्यात आले होते. त्यानंतर रविवारी उत्साहपूर्ण वातावरणात काढण्यात आलेल्या भव्य मिरवणुकीने महोत्सवाची सांगता करण्यात आली.
येथील साहित्यरत्न अण्णाभाऊ साठे यांच्या पूर्णाकृती पुतळ्यास अभिवादन करून रविवारी दुपारी दोन वाजता मिरवणुकीला प्रारंभ झाला. मध्यवर्ती जयंती महोत्सव समितीच्या मार्गदर्शनाखाली निघालेल्या या मिरवणुकीत शहरातील विविध भागांतील सुमारे ५५ मंडळांनी सहभाग नोंदविला. समाजबांधव, सामाजिक संस्था-संघटना, पक्ष पदाधिकारी, कार्यकर्ते आणि तरुणाईची मोठी गर्दी यावेळी पाहायला मिळाली. रात्री दहा वाजता मिरवणुकीचा समारोप झाला.
महापुरुषांच्या विचारांचा जागर
मिरवणुकीत साहित्यरत्न अण्णाभाऊ साठे, वस्ताद लहुजी साळवे आणि भारतरत्न डॉ. बाबासाहेब आंबेडकर यांच्या विचार व कार्याचा जागर करणारे प्रबोधनात्मक देखावे सादर करण्यात आले. लोकशाहीर अण्णाभाऊंचे साहित्य, संयुक्त महाराष्ट्राची चळवळ, गिरणी कामगारांचा संघर्ष, शिक्षणातून परिवर्तन आणि सामाजिक एकजुटीचा संदेश देणाऱ्या देखाव्यांनी उपस्थितांचे लक्ष वेधून घेतले.
डॉल्बीच्या चित्तथरारक आवाजासह रंगीबेरंगी विद्युत रोषणाईने मिरवणुकीत विशेष रंग भरला.विविध गीतांवर तरुणाईने ठेका धरत उत्साहाला उधाण आणले. बुधवार पेठ, मातंग वस्ती, वीर फकीरा चौक, जुना बोरामणी नाका, लष्कर, विजापूर नाका, देगाव, पांढरी वस्ती, अशोक चौक, फॉरेस्ट यासह शहरातील विविध भागांतील मंडळांनी मिरवणुकीत सहभाग घेतला.
साहित्यरत्न अण्णाभाऊ साठे चौकातून सुरू झालेली मिरवणूक रामलाल चौक, डॉ. बाबासाहेब आंबेडकर चौक, चार हुतात्मा पुतळा, मेकॅनिकी चौक मार्गे येऊन छत्रपती शिवाजी महाराज चौक येथे मिरवणुकीची सांगता झाली.
या देखाव्यांनी वेधले लक्ष
आर. के. प्रतिष्ठान : कोहिनूर मिल : लाल बावटा कलापथक यांनी संयुक्त महाराष्ट्र चळवळ आणि गिरणी कामगारांच्या हक्काच्या संघर्षाचा देखावा सादर केला. वारणेचा वाघ युथ फाउंडेशन, पांढरे वस्ती यांनी ‘जग बदल घालुनी घाव – सांगूनी गेले मज भीमराव’ हा देखावा सादर केला. वीर फकीरा तरुण मंडळाने ‘संघर्षातून स्वाभिमान – शिक्षणातून परिवर्तन’ हा संदेश दिला.
एस. एस. ग्रुपने ‘एकजुटीच्या या रथावर आरूढ होऊनी चल बा पुढती…’ हा देखावा सादर करून सामाजिक एकजुटीचे महत्त्व स्पष्ट केले. सी. एस. मित्रपरिवारने महापुरुषांचा देखावा सादर केला. मधला मांगवाडा तालीम सावधान तरुण मंडळाने ‘मुंबई महाराष्ट्राचीच – संयुक्त महाराष्ट्र चळवळ’ हा देखावा सादर केला.
जय लहुजी युवा प्रतिष्ठानने साहित्यरत्न अण्णाभाऊ साठे यांच्या विविध ग्रंथसंपदेचा देखावा साकारला. नवरंग तरुण मंडळ, देगावने आकर्षक देखावा सादर केला, तर लोकशाहीर अण्णाभाऊ साठे तरुण मंडळाने ‘शाळेत नेतानाचा’ देखावा सादर केला. इतर मंडळांनीही लक्षवेधक व प्रबोधनात्मक देखावे सादर करून सामाजिक संदेश दिला.
मान्यवरांची उपस्थिती
मिरवणुकीत साहित्यरत्न अण्णाभाऊ साठे मध्यवर्ती जयंती महोत्सव समितीचे अध्यक्ष साक्षांत लोखंडे, क्रांतिवीर लहुजी शक्ती सेनेचे प्रदेशाध्यक्ष सुरेश पाटोळे, ॲड. शैलेश पोटफोडे, युवराज पवार, अजय मोहिते, बंडू गवळी, वैशाली डोलारे, मनोज लोंढे, महेश लोंढे, किशोर जाधव, प्रवीण वाडे, विशाल लोंढे, सतीश बगाडे, गोविंद कांबळे, विश्वास शिंदे, सुहास शिंदे, शांतीलाल साबळे आदींसह पदाधिकारी, कार्यकर्ते व समाजबांधव मोठ्या संख्येने सहभागी झाले होते.
मंडळांच्या पदाधिकाऱ्यांचा सत्कार
साहित्यरत्न अण्णाभाऊ साठे मध्यवर्ती जयंती महोत्सव समिती, क्रांतिवीर लहुजी शक्ती सेना आणि इतर संघटनांच्या वतीने मिरवणुकीत सहभागी झालेल्या मंडळांच्या प्रमुख पदाधिकाऱ्यांचा सत्कार करण्यात आला.
———
