सोलापूर : अनुदान सेवा सोसायटीच्या वतीने दिल्या जाणाऱ्या ‘सावित्रीबाई फुले आदर्श शिक्षक गौरव पुरस्कार २०२६’ साठी शिक्षण क्षेत्रातील उल्लेखनीय कार्याबद्दल शाफिया कौसर शौकत अली शेख यांची निवड करण्यात आली आहे. शिक्षण क्षेत्रातील योगदान, विद्यार्थ्यांप्रती असलेली समर्पित भावना आणि समाजासाठी केलेल्या उल्लेखनीय कार्याची दखल घेऊन त्यांची या पुरस्कारासाठी निवड करण्यात आली आहे.
क्रांतिज्योती सावित्रीबाई फुले यांच्या शैक्षणिक कार्याचा आदर्श डोळ्यांसमोर ठेवून शिक्षकांच्या कार्याचा गौरव करण्याच्या उद्देशाने या पुरस्काराचे आयोजन करण्यात आले आहे. शिक्षक केवळ विद्यार्थ्यांना शिक्षण देत नाहीत, तर त्यांच्या भविष्याला योग्य दिशा देण्याचे महत्त्वपूर्ण कार्य करतात. अशा शिक्षकांच्या कार्याचा सन्मान करणे, हा या उपक्रमामागील प्रमुख उद्देश आहे.
या पुरस्काराचे वितरण रविवार, १८ ऑक्टोबर २०२६ रोजी सायंकाळी ७ वाजता शिवस्मारक ऑडिटोरियम (ए.सी.), गोल्डफिंच पेठ, सोलापूर येथे होणार आहे.
या कार्यक्रमाचे संयोजक म्हणून डॉ. ए. ए. विजापूरकर आणि डॉ. व्ही. एस. जमादार कार्यरत आहेत. या पुरस्कारामुळे शिक्षण क्षेत्रात उल्लेखनीय काम करणाऱ्या शिक्षकांना प्रोत्साहन मिळणार असून, त्यांच्या कार्याचा गौरव होणार आहे.
