सोलापूर : सौर ऊर्जेबाबत जनजागृती करण्यासह या क्षेत्रातील उद्योजकता आणि रोजगाराच्या संधी ग्रामीण भागापर्यंत पोहोचविण्यासाठी गोपाल काबरा फाउंडेशन आणि जीके एनर्जी यांच्या संयुक्त विद्यमाने ‘सौर संवाद २०२६’ यात्रेचे आयोजन करण्यात आले आहे. दि. १२ ते १८ ऑक्टोबर २०२६ यादरम्यान होणारी ही यात्रा शनिवारी (ता. १७) सोलापूरमध्ये येत आहे. हॉटेल द फर्न रेसिडेन्सी, होटगी रोड, सोलापूर येथे सकाळी ९.३० वाजता मेळावा होणार आहे. राज्यातील ३४ जिल्ह्यांत सौर ऊर्जेचा वापर वाढवण्याच्या उद्देशाने ही यात्रा काढण्यात आली आहे.
केंद्र व राज्य सरकारने सौर ऊर्जेच्या वापरासाठी प्रोत्साहनपर अनेक योजना हाती घेतल्या आहेत. या यात्रेमुळे या योजना लोकांपर्यंत पोहोचण्यास मदत होणार आहे. घरगुती छतावरील (रुफटॉफ) सौर यंत्रणा, व्यावसायिक सौर प्रकल्प, सौर कृषिपंप, ऊर्जा साठवण, यंत्रणा बसविणे, देखभाल आणि वितरण अशा विविध क्षेत्रांतील संधींची माहिती यात्रेदरम्यान दिली जाणार आहे. जीके एनर्जी लिमिटेडचे चेअरमन व व्यवस्थापकीय संचालक गोपाल काबरा मार्गदर्शन करणार आहेत.
