सोलापूर : भारतरत्न डॉ. ए. पी. जे. अब्दुल कलाम यांचे प्रेरणादायी विचार समाजाच्या शेवटच्या घटकापर्यंत पोहोचविणे, युवकांमध्ये वैज्ञानिक दृष्टिकोन रुजविणे आणि राष्ट्रउभारणीसाठी नव्या पिढीला प्रेरित करणे, हेच संमेलनाचे उद्दिष्ट असल्याचे प्रतिपादन डीआरडीओचे वरिष्ठ वैज्ञानिक डॉ. अशोक नगरकर यांनी केले.
सोलापुरातील हुतात्मा स्मृती मंदिर येथे १५ ते १७ ऑक्टोबरदरम्यान पहिले डॉ. अब्दुल कलाम साहित्य संमेलन व राष्ट्रीय चर्चासत्र उत्साहात पार पडले. ड्रीम फाउंडेशन, डॉ. कलाम कौशल्य विकास केंद्र, पुणे आणि चाणक्य गुरुकुल यांच्या संयुक्त विद्यमाने आयोजित या संमेलनाचे मुख्य संयोजक व स्वागताध्यक्ष काशिनाथ भतगुणकी यांनी नेटके नियोजन केले. विविध क्षेत्रांतील मान्यवरांच्या उपस्थितीत साहित्य, विज्ञान, कौशल्य विकास आणि राष्ट्रनिर्मितीवर विचारमंथन झाले.
संमेलनाचे उद्घाटन माजी खासदार व भारत विकास संगमचे राष्ट्रीय संयोजक बसवराज पाटील शेडम यांच्या हस्ते झाले. संमेलनाध्यक्ष म्हणून कवी व प्रेरणादायी वक्ते डॉ. शिवाजी शिंदे यांनी मार्गदर्शन केले. डॉ. कलाम यांचे जीवन संघर्ष, ज्ञान, साधेपणा आणि राष्ट्रनिष्ठेचा आदर्श आहे. त्यांच्या विचारांचा प्रसार नव्या पिढीपर्यंत होणे आवश्यक असून युवकांनी सामाजिक बांधिलकी जपत देशाच्या प्रगतीत योगदान द्यावे, असे आवाहन डॉ. शिंदे यांनी केले. युवकांनी मोठी स्वप्ने पाहून ज्ञान, विज्ञान आणि कौशल्याच्या बळावर ती साकार करावीत. प्रत्येकाने आपापल्या क्षेत्रातून देशाच्या विकासात योगदान देणे हीच डॉ. कलाम यांना खरी आदरांजली ठरेल, असे बसवराज पाटील शेडम यांनी सांगितले. सूत्रसंचालन प्रा. धनाजी चव्हाण यांनी केले, तर प्रा. बाळासाहेब सोनवणे यांनी आभार मानले. ड्रीम फाउंडेशनच्या सचिव संगीता पाटील आणि कार्याध्यक्ष सतीश पाटील यांनी आयोजनात महत्त्वपूर्ण सहभाग घेतला.
राष्ट्रीय चर्चासत्रातून विचारमंथन
संमेलनात डीआरडीओचे वरिष्ठ वैज्ञानिक डॉ. अशोक नगरकर आणि मुंबईचे जीएसटी उपायुक्त महेबूब कासार यांच्यासह विविध क्षेत्रांतील मान्यवर सहभागी झाले. राष्ट्रीय चर्चासत्र, प्रेरणादायी व्याख्याने आणि राष्ट्रीय कवी संमेलनाच्या माध्यमातून विज्ञाननिष्ठ विचार, सामाजिक जाणीव, कौशल्य विकास आणि राष्ट्रनिर्मितीच्या विविध पैलूंवर चर्चा झाली.उद्योगवर्धिनी, नाशिकचे प्रशिक्षक सुनील चांडक यांनी युवकांना स्वयंरोजगाराच्या संधींबाबत मार्गदर्शन केले. कौशल्याधारित प्रशिक्षण घेऊन युवकांनी स्वावलंबी व्हावे आणि रोजगारनिर्मितीत सक्रिय भूमिका बजावावी, असे त्यांनी सांगितले.
विविध क्षेत्रांतील मान्यवरांचा गौरव
शैक्षणिक, सामाजिक, संशोधन, कृषी, महिला व युवा जागृती, ग्रामीण विकास, प्रशासकीय कार्य, क्रीडा, साहित्य आणि पत्रकारिता या क्षेत्रांत उल्लेखनीय योगदान देणाऱ्या व्यक्ती व संस्थांना ‘डॉ. कलाम राष्ट्रउभारणी प्रेरणा पुरस्कार २०२६’ प्रदान करून गौरविण्यात आले.
