माढा – राष्ट्रीय काँग्रेस पक्षाचे महाराष्ट्र प्रदेश प्रवक्ते हणुमंत पवार यांना दोन दिवसापूर्वी पुण्यात मारहाण झाली. त्या घटनेचा निषेध व्यक्त करून सोलापूर जिल्हा काँग्रेस कमिटीचे सचिव जहीर मणेर यांच्या नेतृत्वाखाली माढा तहसीलदार संजय भोसले यांना निवेदनाद्वारे संबंधित व्यक्तीवर कायदेशीर कारवाई करण्यात यावी अशी मागणी केली आहे.
या निवेदनात असे म्हटले आहे की,राष्ट्रीय काँग्रेस पक्षाचे प्रवक्ते हनुमंतराव पवार यांच्यावर तुषार दामगुडे व इतर काही लोकांनी एकत्रितपणे, कथितरीत्या बंदुकीचा धाक दाखवून शारीरिक मारहाण केल्याची अत्यंत गंभीर, धक्कादायक व निंदनीय घटना समोर आली आहे. सार्वजनिक जीवनात कार्यरत असलेल्या व्यक्तीवर प्राणघातक शस्त्राचा धाक दाखवून हल्ला करणे ही बाब केवळ गुन्हेगारी स्वरूपाची नसून, ती भारतीय संविधानाने हमी दिलेल्या अभिव्यक्ती स्वातंत्र्य व विचारस्वातंत्र्य यांवर थेट आघात करणारी आहे.
सदर घटनेत सहभागी व्यक्ती उजव्या विचारसरणीशी संबंधित असताना कोणत्याही विचारसरणीच्या नावाखाली हिंसाचाराचा अवलंब करणे हे लोकशाहीविरोधी व संविधानविरोधी आहे. अशा प्रकारच्या सामूहिक हल्ल्यामुळे समाजात दहशतीचे वातावरण निर्माण होत असून, मुक्त व निर्भय मतप्रदर्शनावर गंभीर परिणाम होत आहे.
तरी, सार्वजनिक शांतता, कायदा व सुव्यवस्था अबाधित ठेवण्यासाठी
सदर प्रकरणाची तात्काळ, निष्पक्ष व सखोल चौकशी करण्यात यावी तुषार दामगुडे व इतर सहभागी व्यक्तींची ओळख पटवून त्यांच्याविरोधात संघटित गुन्ह्याच्या अनुषंगाने कठोर फौजदारी कारवाई करावी बंदुकीचा धाक दाखविण्यात आलेल्या शस्त्राची तात्काळ जप्ती करून, शस्त्र परवाना आहे किंवा नाही याची सखोल तपासणी करण्यात यावी. चौकशी व खटला प्रलंबित असताना, हिंसाचाराला वैचारिक व्यासपीठ मिळू नये व सार्वजनिक शांतता भंग होऊ नये या उद्देशाने, तुषार दामगुडे व संबंधित व्यक्तींना टीव्ही डिबेट्स व सार्वजनिक राजकीय चर्चामध्ये सहभागी होण्यावर प्रतिबंध घालण्यावावत सक्षम प्राधिकरणाकडे शिफारस करण्यात यावी हनुमंतराव पवार तसेच इतर राजकीय कार्यकर्त्यांना आवश्यक ती पोलीस संरक्षण व्यवस्था उपलब्ध करून द्यावी भविष्यात अशा प्रकारच्या घटना घडू नयेत यासाठी प्रतिबंधात्मक व प्रतिबंधक उपाययोजना तात्काळ राबवाव्यात.या लोकशाही विरोधी घटनेचा आम्ही तीव्र शब्दांत निषेध नोंदवित असून, दोषींवर कठोर कारवाई करण्यात यावी असे म्हटले आहे.
याप्रसंगी सोलापूर जिल्हा काँग्रेस कमिटी सचिव जहीर मणेर, प्रदेश काँग्रेस कमिटीच्या सोशल मीडिया विभागाचे सरचिटणीस सचिन खैरे-पाटील, शहराध्यक्ष पृथ्वीराज साठे, अल्पसंख्यांक विभागाचे तालुका उपाध्यक्ष जमीर सय्यद, युवक काँग्रेसचे माजी शहराध्यक्ष अमर राकुंडे, वाकाव गांवचे ग्रामपंचायत सदस्य भारत खंडागळे, दत्तात्रय सावंत, बाबासाहेब ओहोळ, सलीम पिंजारी, जहांगीर काझी, आदी पदाधिकारी व कार्यकर्ते उपस्थित होते.
