सोलापूर : पोलिस अधिक्षक यांच्या विशेष पथकाने बार्शी शहरात गांजा विक्री व अवैध दारू अड्ड्यांवर धडक कारवाई करत एकूण १ लाख ६० हजार रुपयांचा मुद्देमाल जप्त केला. या कारवाईत पाच जणांविरुद्ध गुन्हे दाखल करण्यात आले आहेत.
पोलिस अधीक्षक अतुल कुलकर्णी यांना बार्शी शहरात गांजा तसेच देशी-विदेशी दारूची अवैधरित्या विक्री होत असल्याची गोपनीय माहिती मिळाली होती. त्यानुसार पोलीस निरीक्षक कमलाकर गडमे व विशेष पथकाला कारवाईचे निर्देश देण्यात आले होते. २३ एप्रिल २०२६ रोजी बार्शी शहर पोलीस ठाणे हद्दीत सुभाषनगर, ताडसौंदणे रोड परिसरातील मिरगणे विटभट्टी जवळ सापळा रचून पोलिसांनी ‘सिने स्टाईल’ कारवाई केली. यावेळी किरण अनिल जाधव व रोहित बापू खंडागळे (दोघे रा. पांगरी, ता. बार्शी) यांच्याकडून ५३४.९६ ग्रॅम गांजा, रोख रक्कम व इतर साहित्य असा ८९ हजार ८८४ रुपयांचा मुद्देमाल जप्त करण्यात आला.
याप्रकरणी पांडुरंग सोमनाथ सोनवणे (रा. मांडेगाव, ता. बार्शी) तसेच गांजा पुरवठादार सचिनकुमार मिरगणे व राजेशकुमार मिरगणे (दोघे रा. सुभाषनगर, बार्शी) यांच्याविरुद्ध एनडीपीएस कायद्यान्वये बार्शी शहर पोलिस ठाण्यात गुन्हा दाखल करण्यात आला आहे. तपास पोलिस निरीक्षक बालाजी कुकडे करत आहेत.
त्याचबरोबर, अवैधरित्या देशी-विदेशी दारू विक्री होत असल्याची माहिती मिळाल्यानंतर पोलीस अधीक्षक यांच्या विशेष पथकाने एमएसईबी कार्यालयासमोर असलेल्या श्री गणेश पान शॉप येथे छापा टाकला. या कारवाईत ७० हजार १९५ रुपयांचा दारू साठा जप्त करण्यात आला. याप्रकरणी अक्षय दीपक सरकाळे (रा. झाडबुके मैदान, बार्शी) याच्याविरुद्ध गुन्हा दाखल झाला आहे. या धाडसत्राच्या कारवाईमुळे अवैध धंदेवाल्यांचे धाबे दणाणले आहे.
