महाराष्ट्रात लोकसभेचे ४८ मतदारसंघ असून राज्यातील मतदार कुणाला कौल देणार याकडे सर्वांचं लक्ष लागलंय. २०१९ पासून घडलेल्या घडामोडींचा राज्याच्या राजकारणावर परिणाम दिसून येऊ शकतो.
२०२४ ची लोकसभा निवडणूक देशाच्या आगामी राजकारणाच्या दृष्टीनं महत्त्वाची ठरणार आहे. उत्तर प्रदेशनंतर सर्वाधिक जागा महाराष्ट्रात आहेत. राज्यातील ४८ लोकसभा मतदारसंघात मविआ आणि महायुतीत टक्कर होणार आहे. २०१९ च्या लोकसभा निवडणुकीत भाजपला २३ तर शिवसेनेला १८ जागा मिळाल्या होत्या. २०१९ च्या विधानसभा निवडणुकीनंतर राज्यातील राजकारणात मोठ्या घडामोडी घडल्या आहेत. शिवसेना आणि राष्ट्रवादी काँग्रेसमध्ये फूट पडलीय. त्यामुळं राज्यातील लोकसभा निवडणुकीची गणित बदलली आहेत.
भाजपला कशाची चिंता सतावतेय?
भाजपला शहरी भागात चांगली कामगिरी करण्याची अपेक्षा आहे. तर, ग्रामीण भागात भाजपला कशी कामगिरी असेल याची चिंता आहे. राज्यातील कृषी क्षेत्रावर संकट आहे. अवकाळी पाऊस आणि कृषी मालाचे पडलेले दर यांनी शेतकऱ्यांना मोठा फटका बसला आहे. टोमॅटो, कांदा दर पडल्यानं शेतकरी सातत्यानं संकटात सापडले आहेत. शेतमालाच्या निर्यातीवर बंदी आणि शुल्क लादल्यानं शेतकरी अडचणींचा सामना करत आहेत. राज्यातील शेतकऱ्यांचा संताप विकसित भारत यात्रेला होणाऱ्या विरोधाच्या माध्यमातून दिसून येत आहे. त्यामुळं शेतकऱ्यांच्या असंतोषाचा फटका भाजपला बसण्याची भीती आहे.
शिवसेना आणि राष्ट्रवादीत फूट
शिवसेनेत जून २०२२ मध्ये फूट पडली तर राष्ट्रवादी काँग्रेसमध्ये जुलै २०२३ ला फूट पडली आहे. यामुळं राज्यातील प्रमुख प्रादेशिक पक्षांची ताकद विभागली गेलीय. राष्ट्रवादीनं गेल्या वेळी राज्यात चार जागांवर विजय मिळवला होता. यावेळी काय होणार याकडे सर्वांचं लक्ष लागलंय. तर, शिवसेनेची ताकद विभागली गेली आहे. त्यामुळं गेल्या वेळी १८ जागा जिंकणारा पक्ष किती जागा जिंकणार याकडे सर्वाचं लक्ष लागलेलं आहे.
३२ ते ३५ जागांवर भाजप लढणार?
एकनाथ शिंदे यांच्याकडे निवडणूक आयोगाच्या निकालानंतर पक्षाचं नाव आणि चिन्ह आहे. मात्र, गेल्या वेळेस जिंकलेल्या १८ जागा ते पुन्हा जिंकू शकणार का हा प्रश्न आहे. आमदार आणि खासदार जरी एकनाथ शिंदे यांच्यासोबत गेले असले तर शिवसेनेचे केडर उद्धव ठाकरे यांच्यासोबत असल्याचं बोललं जातं. त्यामुळं भाजप एकनाथ शिंदे यांच्यासोबत असलेल्या काही खासदारांना कमळाच्या चिन्हावर निवडणूक लढवण्याची संधी देऊ शकतं. राज्यात सर्वाधिक जागा जिंकण्यासाठी भाजप ३२ ते ३५ जागा लढवण्याची शक्यता आहे.
काँग्रेसची स्थिती सुधारणार?
२०१४ आणि २०१९ च्या लोकसभा निवडणुकीत काँग्रेसला फटका बसला होता. काँग्रेसला २०१४ ला दोन जागांवर तर २०१९ ला एका जागेवर विजय मिळाला होता. मात्र, यावेळी काँग्रेसची स्थिती सुधारण्याची शक्यता असल्याचं बोललं जातंय. २०२३ मध्ये झालेल्या पोटनिवडणुकीत कसबा मतदारसंघात भाजपचा २८ वर्षांचा बालेकिल्ला काँग्रेसनं ताब्यात घेतला होता. महाविकास आघाडीत आता वंचित बहुजन आघाडी देखील सहभागी होणार असल्याच्या चर्चा आहेत. मविआच्या एकत्रित ताकदीचा काँग्रेसला फायदा होऊ शकतो.
