सोलापूर – अक्कलकोट तालुक्यात दलित वस्ती सुधारणा निधीच्या कथित गैरवापराचा गंभीर प्रकार समोर आल्याने ग्रामस्थांमध्ये संतापाची लाट उसळली आहे. दलित वस्त्यांच्या विकासासाठी मंजूर करण्यात आलेला निधी इतरत्र खर्च केल्याचा आरोप होत असून, या प्रकरणी माजी गृहराज्यमंत्री सिद्धाराम म्हेत्रे यांनी जिल्हा परिषदेचे मुख्य कार्यकारी अधिकारी कुशल जैन यांची भेट घेऊन सविस्तर निवेदन सादर केले.
दलित वस्ती सुधारणा निधी हा अनुसूचित जाती समाजाच्या वस्त्यांमध्ये रस्ते, गटारी, पाणीपुरवठा, वीज, स्वच्छता आणि इतर मूलभूत सुविधा उभारण्यासाठी वापरणे बंधनकारक असताना, काही गावांमध्ये हा निधी सवर्ण वस्त्यांमध्ये वळवण्यात आल्याचा आरोप करण्यात आला आहे. गावातील सरपंच, ग्रामसेवक आणि गटविकास अधिकारी यांच्या संगनमतातून हा प्रकार घडल्याचे निवेदनात नमूद करण्यात आले आहे.
या संदर्भात गावकऱ्यांनी माहिती अधिकारातून व थेट प्रशासनाकडे माहिती मागितली असता, संबंधितांनी माहिती देण्यास टाळाटाळ केल्याचा आरोपही करण्यात आला. एवढेच नव्हे तर काही ग्रामस्थांना जीवे मारण्याच्या धमक्या देण्यात आल्याची धक्कादायक बाबही समोर आली आहे. त्यामुळे या प्रकरणाला अधिक गंभीर स्वरूप प्राप्त झाले आहे.
माजी गृहराज्यमंत्री सिद्धाराम म्हेत्रे यांनी सांगितले की, दलित समाजाच्या हक्काचा निधी परस्पर गायब केला जात असून, याबाबत वारंवार विचारणा करूनही अधिकारी व प्रशासन दिरंगाई करत आहेत. दोषींवर तातडीने कारवाई व्हावी, अशी मागणी त्यांनी केली. दरम्यान, मुख्य कार्यकारी अधिकारी कुशल जैन यांनी या तक्रारीची दखल घेत संबंधित विभागामार्फत सखोल चौकशी केली जाईल, असे आश्वासन दिले. तसेच आठ दिवसांनंतर पुन्हा भेट घेऊन अहवाल सादर करण्याचे निर्देशही त्यांनी दिल्याची माहिती समोर आली आहे.
अक्कलकोट तालुक्यातील या प्रकारामुळे दलित वस्ती विकास योजनांच्या अंमलबजावणीवर प्रश्नचिन्ह निर्माण झाले आहे. शासनाचा निधी खऱ्या लाभार्थ्यांपर्यंत पोहोचतो का, असा सवाल ग्रामस्थ उपस्थित करत आहेत. आता प्रशासन या प्रकरणात काय भूमिका घेते आणि दोषींवर कारवाई होते का, याकडे सर्वांचे लक्ष लागले आहे.
माहितीच्या अधिकारातून माहिती मागितली असता अपील घेणे बंधनकारक आहे. मात्र संबंधित गटविकास अधिकाऱ्यांनी ग्रामसेवक अपील घेत नाहीत. तारीख देत नाहीत. यासंबंधी विचारणा केल्यास जीवी मारण्याची धमकी देतात. अशी तक्रार देखील यामध्ये ग्रामस्थांनी नमूद केली आहे.
